Oddiy sabzining oddiy bo‘lmagan shifobaxsh xususiyatlari
Ko‘pchilikning uyida har doim bir necha turdagi dori topilishi mumkin. Lekin agar oddiygina sabzi iste’moli to‘g‘ri yo‘lga qo‘yilsa, dori quti tez orada unutilishi hech gapmas. Uning o‘rnini esa sharbat tayyorlagichga bo‘shatib beravering. Agar turli do‘konlarda, yoki oshxonamizda qator turgan sharbatlar ichidan sabzi sharbati ham o‘rin olganida, shubhasiz ko‘chalardagi dorixonalar soni ham bugungichalik ko‘p bo‘lmasdi.
Ko‘pchilik uchun bir vaqtning o‘zida 5 dona sabzi yoki 3 dona olmani yeyish qiyindir. Lekin bir piyola sabzi yoki olma sharbatini ichish hech qanday qiyinchilik tug‘dirmaydi. Undan tashqari, organizmga oziq-ovqatlardan ko‘ra, sharbatlardan ko‘proq vitaminlar so‘riladi.
Sabzi sharbati A provitamini hamda beta-karotin bilan boyitilgan. Ular miya tomirlarini mustahkamlab markaziy asab tizimida qon aylanishini yaxshilaydi.
150 ml. sabzi sharbati inson terisi, ko‘zlar va immunitet tizimi salomatligi uchun bir kunlik ehtiyojni qondiradi. U suyak va tishlar salomatligini saqlashga yordam beradi. Sabzidagi V darmondorilari esa asab tizimi faoliyatini yaxshilab, soch va tirnoqlarning o‘sish jarayonini tartibga soladi.
100 ml sabzi sharbatidagi C darmondorisi kunlik miqdorining 33 foizi va K vitaminining yarmini o‘z ichiga oladi.
C darmondorisi immunitet tizimi va yurak-qon tomir tizimi uchun foydali bo‘lsa K darmondorisi qon ivishiga ijobiy ta’sir ko‘rsatadi va kalsiyning tanaga so‘rilishi va metabolizmda yordam beradi. Sabzi tarkibidagi Ye vitamini terining salomatligi uchun muhim bo‘lib, u A vitamini so‘rilishiga yordam beradi.
Yangi sabzi sharbati uzoq muddatli og‘ir kasallikdan turganlar, shuningdek, keksalar uchun juda zaruriy ichimlik.
Ammo, ovqat hazm qilish bilan bog‘liq muammolar hamda gastrit va pankreatit xurujlarida sabzi sharbatidan foydalanish tavsiya etilmaydi.
Sabzi ichak mikroflorasini oziqlantiradi, sharbati qon aylanish tizimi uchun foydali, C vitamini, kaliy va magniyga boyligi bilan qon tomirlari va yurak mushaklarini mustahkamlaydi.
Sabzi sharbati 10 oylikdan katta yoshlarda bolalarning ko‘rish jarayonini, asab tizimi va ichaklar sog‘lig‘ini yaxshilaydi.
Sabzi sharbati tarkibidagi antioksidant moddalar: C, A, Ye vitaminlari teri, tirnoqlar va sochlar go‘zal va sog‘lomligi uchun juda muhim. Bu mazali ichimlik ayollar reproduktiv tizimiga ham ijobiy ta’sir ko‘rsatadi. Sabzi sharbatidagi karotin ayollardagi gormonal jarayonni tartibga soladi va bepushtlik ehtimolini kamaytiradi.
Sabzi sharbati erkaklar reproduktiv tizimiga ijobiy ta’sir ko‘rsatadi, qonda shakar miqdorini pasayishiga yordam beradi, xolesterin chiqarilishini tezlashtiradi.
