Олимлар уруғлик картошка етиштиряпти
Самарқанд агроинновациялар ва тадқиқотлар институтида “Ўзбекистонда картошка уруғчилик тизимини янада ривожлантириш ва кадрлар салоҳиятини ошириш” халқаро лойиҳаси доирасида амалга оширилган ишларга бағишлаган тадбир бўлиб ўтди.
Семинарда Жанубий Кореянинг Халқаро боғдорчилик институти вакиллари, соҳа мутахассислари, институт профессор-ўқитувчилари ва картошкачилик билан шуғулланувчи тадбиркорлар иштирок этди.
- Лойиҳа бошланганда, бугунги ҳолатга келишини тасаввур қилмагандим, - деди Қишлоқ хўжалиги вазири ўринбосари Жамшид Абдузуҳуров. - Мамлакатда картошка уруғчилиги бўйича муаммолар бор эди. Бу борада аввал ишлар бошланган бўлса-да, давом эттирилмаган. Мана, бугун институт олимлари Жанубий Корея олимлари билан ҳамкорликда самарали ишларни йўлга қўйди, яъни Ўзбекистон шароитида ҳам уруғлик картошка етиштириш мумкинлигини исботлади. 2030 йилга бориб биз Ўзбекистонда тўлиқ картошка уруғчилигини йўлга қўймоқчимиз.
Шуни алоҳида таъкидлаш керакки, лойиҳа соҳага оид Ўзбекистон Республикаси Президенти қарори (ПҚ-269) ҳамда ҳукуматнинг бевосита қўллаб-қувватлаши натижасида ўз фаолиятини бошлаган эди. Бунинг натижасида эса институтда картошка туганакларини лабораторияда яратишдан тортиб гидропоника усулида етиштириш, уни қулай шароитда сақлашгача бўлган бутун бошли тизим шакллантирилди.
Семинар давомида Ўзбекистон уруғлик картошка етиштиришнинг ҳозирги ҳолати ва келгуси режалар, лойиҳа доирасида бажарилаётган ишлар ҳақида маърузалар тингланди.
Якунда эса Корея Халқаро боғдорчилик институти мутахассиси Чо Ҳюн Моок уруғлик картошка етиштириш тизимининг бош режасини тақдимот қилди. Эксперт бош режа институтда амалга оширилган илмий изланишлар, Қишлоқ хўжалиги вазирлиги мутахассислари иштирокида мамлакатда соҳанинг ҳолати илмий ўрганилиши натижасида ишлаб чиқилганини таъкидлади. Кореялик олим яқин йилларда картошкачиликда юқори натижаларга эришиш кутилаётганини айтди.
Тадбир сўнгида меҳмонлар институтда лойиҳа доирасида амалга оширилган ишлар билан танишди.
