Охирги марта қачон почта хизматидан фойдалангансиз?

Бир вақтлар елкасида хат ва газетага тўла сумка билан велосипедда келаётган почтачиларни кўриб, "Бизга ҳам хат борми?", деб қизиқиш билан сўрардик.

Почтачи хонадонма хонадон юриб, жўнатмаларни қўлингизга топшириб кетарди. Агар телеграмма, бандерол ёки посилка келиб қолса борми, хурсандчилигимиздан ичимизга сиғмай кетардик. Ҳеч нарса бўлмаганда ҳам кундалик газеталардан олиб қолардик. Бироқ бугунуларни кам кўрадиган бўлиб қолгандик. Борлари ҳам ЙПХ жарималари ва турли идоралардан келган огоҳлантирувчи хатларни бериб кетади.    

Бугунги кунда замонавий почта хизматида жуда кўп ўзгаришлар содир бўлаётган бўлсада, лекин тизимнинг мақсади ўзгармаган. Почталарни хонадонларга етказишда доимо муҳимлик қоидасига амал қилинади. Хабарномали хатларни келган куниёқ элтиб бериш шарт. Чунки уни юборган тарафга етказиб берилгани тўғрисида телефон орқали алоҳида хабарнома юборилади. Бунинг учун жўнатаётган тараф қўшимча пул тўлаган бўлади. Кейин эса ЙПХ жарималари, тўловларга оид ва суд хабарлари тарқатилади. Жарималар юборилган кундан бошлаб 15 кун ичида тўланса, 30 фоизли чегирма бўлади, шунинг учун кечикиши мумкин эмас. Бу эса почтачиларга алоҳида масъулият юклайди. 

Хўш, бугун тизимда қандай янгиликлар ва ўзгаришлар амалга оширилмоқда?

Бугунги кунда “Ўзбекистон почтаси” АЖ вилоят филиали қошида 199 та алоқа бўлими ва 16 та марказий амалиёт заллари фаолият кўрсатмоқда. 630 нафардан зиёд почта ходимлари ёрдамида 4 та туманлараро, 16 та туманлар ичида ҳафтасига 6 марта почта алмашинуви амалга ошириб келинмоқда. Шунингдек, почта, хат, бандероль, пакет, даврий нашрлар, пул ўтказмалари каби 30 дан ортиқ универсал почта ва курьерлик хизматлари  кўрсатиляпти.     

- Президентимизнинг 2020 йил 14 декабрдаги “Почта алоқаси хизматларини кўрсатиш тизимини тубдан такомиллаштириш чора-тадбирлари тўғрисида”ги қарори билан почта алоқаси хизматларини кўрсатиш тизимини тубдан такомиллаштиришга хизмат қилмоқда, - дейди “Ўзбекистон почтаси” АЖ Самарқанд филиали бошлиғи Ўринбой Мавлонов. - Соҳага замонавий технологияларни жорий этиш, почта алоқаси хизматларини тақдим этиш фаолиятини тўлиқ автоматлаштириш орқали Почта ривожланиши индекси глобал рейтингида биринчи 50 таликка киритиш кўзда тутилган. Почта ва курьерлик хизматлари фаолияти билан шуғулланувчи маҳаллий ва хорижий компаниялар билан ҳамкорликда «якуний манзил» хизмати жорий этиляпти. Шунингдек, почта алоқасининг анъанавий хизматларини такомиллаштириш, уларни рақамлаштириш, жўнатмаларни қабул қилиш, кузатиб бориш ва етказиш жараёнларига ахборот технологиялари ва тизимларини жорий этиш орқали аҳоли, бизнес ва давлат идораларига замонавий хизматлар тақдим этилмоқда. 

“Ўзбекистон почтаси” вилоят филиалига почта жўнатмаларини манзилгача етказиб бериш учун 11 та юк машиналари, почта ходимлари учун 29 та электроскутерлар ажратилиши филиалнинг моддий-техник базасини янгилаш ва жўнатмаларни қисқа муддатларда манзилларига етказишни таъминламоқда. Шаҳар ва туманлардаги 35 та почта алоқа бўлими ягона корпоратив дизайн асосида жиҳозланиб, оптик толали алоқа линиялари ўтказилди ва замонавий қурилмалар ўрнатилди. Ҳудудлардаги 80 та почта алоқа бўлимида 60 турдаги давлат хизматлари, 63 та почта алоқа бўлимида банк ҳамда суғурта хизматларини кўрсатиш жорий этилмоқда. Шунингдек, замонавий компьютер, принтер ва кўп функцияли мобил қурилмалар билан таъминланди. Шаҳар ва туман марказларига 14 та почтаматлар ўрнатилди.

Самарқанд почта алоқаси боғламаси биноси ҳам замонавий кўринишга келтирилди, - дейди Самарқанд шаҳар марказий почта алоқа тармоғи бўлим бошлиғи Лола Ҳасанова тизим фаолиятинин ўрганиш мақсадида журналистлар учун ташкил этилган пресс-турда. - Логистика маркази ташкил этилиб, почтамат ўрнатилди. «Гибрид почта» жўнатмаларини қабул қилиш ва етказиб бериш хизматлари сони 2 баробарга оширилди. Жорий йилнинг март ойида 77 мингдан зиёд турли шаклдаги хатлар қабул қилиниб, ўз эгаларига етказиб берилган бўлса, апрель ойида уларнинг сони 83 мингга етди.

Почта бўлимлари томонидан “Гибрид почта” ва “Бир қадам” хизматлари, даврий нашрларга обуна қабул қилиш, телеграмма, посилка қабул қилиш ва жўнатиш йўлга қўйилган. Шунингдек, ҳар ойда янгиланган ахборот тизимида ўртача 20 миллиард сўмга яқин коммунал ва бошқа хизматлар учун тўловлар қабул қилинмоқда. 

Журналистлар пресс - тур давомида Самарқанд шаҳар марказий почта алоқа тармоғида бўлиб, тизимда амалга оширилаётган ўзгаришлар билан яқиндан танишдилар. 

Дилмурод ТЎХТАЕВ.