Ўзбек санъатида катта йўқотиш – Ортиқ Отажанов улуғ айём кунлари оламдан ўтди

Бу сана ўзбек санъати ва шахсан менинг ҳаётимда ҳам катта йўқотиш куни сифатида муҳрланиб қолади. Бугун қадрдон акам, ўзбек санъатининг забардаст намоёндаси, менинг болалик устозим, кумирим бўлган санъаткор Ортиқ Отажонов оламдан ўтди.
Куни кеча Тоҳир Маликдек улуғ ёзувчини охирги йўлга кузатган эдик. Бугун...
Ортиқ акани яқингинада Муҳаммад Исмоил хонадонида кўргандим, суҳбатлашиб, бироз латифаларини эшитиб кулишган эдик. Муҳаммад аканинг умрага кетиши олдидан ёзган дастурхонида айтган гапларини ўзига билдирмай диктофонга ёзиб ҳам олгандим. Кутиб олиш маросимида Омон Матжонга, бошқаларга ҳазил-ҳузул қилиб бироз ўтирдилар, бироқ ош тортилгунигача кутмасдан турдилар. Бир қадар бесаранжом алпозда эди. Чиқиб туриб дарвоза олдида ҳам аллақанча гаплашиб турдик, суратга тушдик. Муҳаммад акага минг раҳмат, шу одати яхши, ҳар бир тадбирми, учрашувми, расмга олиб, тарихга муҳрлаб қўяди. Эҳ, шу сурат ҳозиргина кўз ўнгимдан ўтган эдия...
Акани янганинг бевақт вафоти ола кетди, чамаси. Ўзи аввал оилада аёл оламдан ўтса, эркак кишига жуда ҳам қийин бўлади, деган гап бор. Ўша гап бор гап. Буни ҳаётда кўп кўрдик.
Не бўлганда ҳам Ортиқ Отажонов ўзбек халқи ҳаётида нурли из қолдириб кетди. У яратган бир-биридан бетакрор санъат намуналари асрлар давомида янграйди, одамлар қалбига эзгулик уруғини сочади. Дунёда ўзбек миллатининг бошқаларда учрамайдиган сувворалари, Ферузлари,Алиқамбар-у, дугоҳлар, Лазги, яллалари, Ортиқ Отажоновнинг фақат ўзигагина хос бўлган юзлаб муаллифлик қўшиқларини ҳали Ортиқ ака кўп ва хўп дунёга тараннум этадилар. Биз уларни радио тўлқинлари, магнит тасмалари орқали тинглаймиз, нурли хотиралар билан ёдга оламиз."Сенинг кулишларинг", "Келсин", "Турналар", "Ота-онанг", "Ватандин айри кўнгилни...", "Сева олмаслар","Турли-турли", "Ҳайрон-ҳайрон", "Билмиш","Кўрмайин қолдим","Дарёларнинг ул юзида...","Васлинг кутиб"...
Энди меҳрибон Аллоҳдан илтижолар қилиб сўраймиз: Элга суйдирганинг бу ўғлоннинг охиратини ҳам обод қилгин, равзаи жаннат боғларидан жой бериб, савол-жавобларини енгил қилгин, мушкулларини осон қилгин...
Ортидан асрлар оша бориб турадиган савобларини кўпайтириб бергин...
Аканинг фарзандлари, набиралари, укалари, барча яқинларига, мухлисларига Аллоҳдан сабр тилайман.

Ҳусан Эрматов.