Oziq-ovqat mahsulotlari markirovkasida kamchiliklar bor
Raqobatni rivojlantirish va iste’molchilar huquqlarini himoya qilish qo‘mitasi o‘rganishlarida samarqandlik ishlab chiqaruvchilar ham qator kamchiliklarga yo‘l qo‘yganligi aniqlangan.
Amaldagi tartibga ko‘ra, iste’molchilar xarid qilayotgan oziq-ovqat mahsulotlari haqida to‘liq va aniq ma’lumotga ega bo‘lishi shart. Shu maqsadda Raqobatni rivojlantirish va iste’molchilar huquqlarini himoya qilish qo‘mitasi hamkor tashkilotlar bilan mahsulotlarning qonunchilik talablariga muvofiqligini o‘rgangan.
Respublika bo‘ylab o‘tkazilgan o‘rganishlarda 298 ta mahsulot tekshirilib, ulardan 143 tasi sut mahsulotlari - qaymoq, smetana, kefir, yogurt, tvorog, 30 tasi muzqaymoq, 70 tasi go‘sht mahsulotlari - sosiska va kolbasa, 55 tasi non va bulochka mahsulotlari bo‘lgan.
Tekshiruvlar davomida qator qonunbuzarliklar aniqlangan. Xususan, 53,7 foiz mahsulotlarda texnik reglament va standartlar ko‘rsatilmagan, 26 foizida ishlab chiqarilgan sana yozilmagan, 11,8 foizida amal qilish muddati ko‘rsatilmagan, 11,1 foizida esa saqlash shartlari to‘g‘risida ma’lumot yo‘q.
Bundan tashqari, o‘rganilgan 3,7 foiz mahsulotlarda ishlab chiqaruvchi nomi va manzili, 0,7 foizida mahsulotning savdo nomi ko‘rsatilmagan.
Misol uchun, Samarqanddagi “PURE MILKY WORKS” xususiy korxonasi ishlab chiqarayotgan sut va sut mahsulotlarida texnik reglament va partiya raqami ko‘rsatilmagan. “BAXT” korxonasi ishlab chiqarayotgan kolbasalarda ishlab chiqarish sanasi va saqlash muddati hamda mahsulotga qo‘shilgan tovuq terisining miqdori va o‘lchami yirikroq yozilmaganligi aniqlangan. “AGRO BRAVO” MChJ ishlab chiqarayotgan muzqaymoqlarda texnik reglament va partiya raqami ko‘rsatilmagan.
Qo‘mita aniqlangan kamchiliklarni bartaraf etish bo‘yicha zarur chora-tadbirlarni amalga oshirgan.
Qayd qilinishicha, iste’molchilarning huquqlarini himoya qilish borasida bu kabi tekshiruvlar doimiy ravishda olib boriladi. Xaridorlar aniq va ishonchli ma’lumotga ega bo‘lishi uchun mahsulotlarning qonuniy talablarga javob berishini ta’minlash ishlab chiqaruvchilarning burchidir. Qo‘mita bu masalada nazoratni kuchaytirib, zarur huquqiy choralarni ko‘rishda davom etadi.
