"Oziq-ovqatdan qurol sifatida foydalanishmi?": Kreml g‘alla bitimi bekor qilinganini e’lon qildi
Rossiya tomonidan Qora dengiz yo‘li orqali g‘alla eksporti bo‘yicha imzolangan xalqaro shartnoma doirasida kecha Istanbulda so‘nggi ukraina g‘allasi ortilgan kema ko‘rikdan o‘tdi. Moskva Qrim ko‘prigining bir qismini qulatgan ikki portlashdan bir necha soat o‘tib “don kelishuvi”dan chiqqanini e’lon qildi.
Bu haqda Rossiya Federatsiyasi prezidentining matbuot kotibi Dmitriy Peskov ma’lum qildi. Kreml vakilining so‘zlariga ko‘ra, bu Rossiya talab qilgan kelishuv shartlari bajarilmagani tufayli sodir bo‘lgan, deb yozadi “Interfaks”.
Rossiya Tashqi ishlar vazirligi Rossiya kema qatnovi xavfsizligi kafolatlarini chaqirib olishi va Qora dengiz shimoli-g‘arbiy qismidagi dengiz gumanitar koridorini cheklash, shuningdek, u yerda vaqtinchalik xavfli hudud rejimini tiklayotganini ma’lum qilgan. Tashqi ishlar vazirligi bayonotida aytilishicha, “Qora dengiz tashabbusi” 18 iyuldan boshlab o‘z faoliyatini to‘xtatadi, Istanbuldagi qo‘shma muvofiqlashtirish markazi tarqatib yuboriladi.
Rossiya va Ukraina Turkiya va BMT ishtirokida 2022 yil iyul oyida Qora dengiz portlaridan g‘alla eksporti bo‘yicha kelishuv imzolagan edi. O‘shandan beri u bir necha bor uzaytirilgan.
Rossiya kelishuvni uzaytirish uchun bir qancha shartlarni ilgari surmoqda. Ular orasida ammiakning Ukraina orqali Yevropaga to‘siqsiz yetkazib berilishi, shuningdek, Rossiya Qishloq xo‘jaligi bankining sanksiyalar ostida uzilgan SWIFT tizimiga ulanishi ham bor.
“Rossiyaning “G‘alla bitimi”dan chiqishi millionlab odamlarga ochlik bilan tahdid qilmoqda”, - dedi BMT Bosh kotibi. Antonio Guterres Moskvani o‘z fikridan qaytishga chaqirdi.
Yevropa ham chetda qolmadi. Germaniya kansleri Olaf Shols shunday dedi:
"Buning ortida nima borligini hamma tushunadi, bu aslida Rossiya dunyoda odamlar yaxshi yashashi uchun javobgarlikni his qilmasligi bilan bog‘liq."
Ukraina va Rossiya dunyodagi eng yirik don eksportchilaridan biri bo‘lib, ushbu eksportsiz dunyoda g‘alla narxi oshib ketishi kutiladi.
