ЎзЛиДеП бу йил 105 лойиҳани амалга оширмоқчи
Ўзбекистон Либерал-демократик партияси Самарқанд вилояти кенгаши ҳамда халқ депутатлари вилоят Кенгашидаги ЎзЛиДеП депутатлик гуруҳининг қўшма мажлиси бўлиб ўтди.
Унда партиянинг вилоят, туман ва шаҳар кенгашлари ҳамда маҳаллий Кенгашлардаги депутатлик гуруҳлари олдида турган устувор вазифалар муҳокама қилинди.
Партия вилоят кенгаши раиси Илҳом Ботиров “Маҳаллани ривожлантириш ва жамиятни юксалтириш” йилида амалга оширилаётган ислоҳотлар дастурлари ҳамда “Ўзбекистон — 2030” стратегиясини ҳаётга татбиқ этиш бўйича қабул қилинган давлат дастури ижросини таъминлашда ЎзЛиДеП олдида турган масалаларга эътибор қаратди.
Мажлисда Давлат дастури ижросини таъминлашда партия ташаббуси билан ишлаб чиқилган 105 та лойиҳанинг жойларда сифатли амалга оширилиши юзасидан чора-тадбирлар белгиланди.
Шунингдек, халқ депутатлари вилоят Кенгашидаги ЎзЛиДеП депутатлик гуруҳининг 2026 йилга мўлжалланган иш режасига қўшимча ва ўзгартиришлар киритиш ҳамда унинг ижросини таъминлашда депутатларнинг масъулиятини ошириш, депутатлик назоратини кучайтириш юзасидан фикр ва таклифлар билдирилди.
