Президент суҳбатлашган ургутлик тадбиркорда мотивация пайдо бўлди

Ёш тадбиркор Мажидхон Исломов “Urgut sanoat servis” оилавий корхонаси бошлиғи. Хорижга бориб, ишлаб, кўйлак ишлаб чиқаришни ўрганиб келган. Шу тарзда ўзининг тадбиркорлик фаолиятини бошлаб, Ургутда биринчилардан бўлиб, эркаклар кўйлаклари ишлаб чиқаришни йўлга қўйган.

Мажидхон билан илк бор бундан тўрт йил аввал, эндигина иш бошлаган пайтларда учрашиб, суҳбатлашган эдик. Ўшанда у туман марказидаги бинолардан бирини ижарага олиб, ака-укалари, тўрт-беш нафар ишчи билан фаолият кўрсатарди.

2017 йилда давлатимиз раҳбари фармони билан “Ургут” эркин иқтисодий зонасининг ташкил этилиши кўплаб ургутлик тадбиркорлар қатори Мажидхон Исломов учун кенг имкониятлар эшигини очди. Унга ҳам Мерганча массивидан жой ажратилиб, ўз корхонасини ташкил этишига шароит яратиб берилди.

М.Исломов бугун иқтисодий зонадаги катта бир корхонанинг эгаси. 50 дан ортиқ ишчи, асосан ёшлар Туркия ва Хитойдан келтирилган ускуналар ёрдамида йилига 600 минг дона эркаклар кўйлаги ишлаб чиқармоқда. Ўтган йили корхона 10,2 миллиард сўмлик маҳсулот ишлаб чиқариб, 100 минг долларлик маҳсулот экспорт қилган. Бу йил эса ишлаб чиқаришни 2 миллаирд сўмга, экспортга икки баробар ошириш режалаштирилган.

Яқинда давлатимиз раҳбари вилоятимизга ташрифи чоғида Ургут туманида ҳам бўлиб, эркин иқтисодий зонада фаолият кўрсатаётган корхоналар фаолияти билан танишди, тадбиркорлар билан суҳбатлашди. Мажидхон Исломов ҳам Президентнинг назарига тушиб, давлат раҳбари билан кўришиш, суҳбатлашиш бахтига муяссар бўлди.