Энг йирик чучук сув захираларига эга мамлакатлар
Чучук сув дунёдаги энг муҳим ресурслардан бири, бироқ у бир текис тақсимланмаган. Баъзи мамлакатлар кўллар, дарёлар ва музликларга бой бўлиши бўлиши мумкин, аммо айримлари жиддий сув танқислигига дуч келмоқда.
Инфожадвалда Жаҳон банки маълумотлари асосида мамлакатлар бўйича қайта тикланиши мумкин бўлган чучук сув ресурслари кўрсатилган. Тахминларга кўра, чучук сув сайёрамиздаги умумий сувнинг атиги 2,5 фоизини ташкил қилади, унинг кўп қисми музликлар ва ер остида қолиб кетган.
Бразилия (дунёдаги чучук сувнинг 13%и) Амазон ҳавзаси туфайли қайта тикланадиган чучук сув захиралари бўйича дунёда биринчи ўринда туради. Бу дунёдаги дарёлар оқимининг тахминан бешдан бир қисмини ташкил қилади.
Россиянинг чучук сув ресурслари (дунёдаги чучук сув захираларининг 10%дан ортиғи) минглаб дарё ва кўлларда, шу жумладан, дунёдаги музламаган чучук сув захираларининг 20 фоизини ўз ичига олган Байкал кўлида жойлашган.
Канадада (дунёдаги чучук сувнинг 6,7%и) икки миллиондан ортиқ кўллар, жумладан, Шимолий Америка ер усти чучук сувининг 84 фоизини ўз ичига олган Буюк кўллар мавжуд.
АҚШ (дунёдаги чучук сувнинг 6,6%и) катта чучук сув ресурсларига эга: Миссисипи, Колорадо ва Колумбия каби йирик дарё тизимлари миллионлаб одамларни сув билан таъминлайди. Шундай бўлса-да, мамлакатнинг жануби-ғарбий ҳудудларида сувли қатламлар тўлдирилишга қараганда тезроқ тугаб бораётгани натижасида сув танқислиги тобора жиддий муаммога айланиб бормоқда.
Хитойнинг чучук сув ресурслари (дунёдаги чучук сувнинг 6,6%и) жуда катта, лекин ресурслар нотекис тақсимланган: ёғингарчилик жанубда, қурғоқчил шимолга қараганда кўпроқ тушади. Қишлоқ хўжалиги, саноат ва 400 миллиондан ортиқ аҳолини қўллаб-қувватловчи Янцзы дарёси мамлакатнинг муҳим сув манбаи ҳисобланади.
Шунингдек, сув бугунги кунда ўсиб бораётган геосиёсий можаролар манбаига айланиб бормоқда. Хитойдан бошланадиган дарёларнинг қуйи оқимидаги мамлакатлар ўз оқимларини назорат қилиш учун курашиб яшашига тўғри келяпти.
