Қўшработда маҳалланинг янги биноси ва оилавий поликлиника фойдаланишга топширилди
“Камбағалликдан фаровонлик сари” дастури барпо этилган маҳалла биноси 3437 нафар аҳоли яшайдиган энг чекка ҳудудда жойлашган майинтепаликлар учун ажойиб туҳфа бўлди.
Бинонинг очилиш маросимида Адлия вазири Акбар Тошқулов, туман ҳокими Дилшод Шакарбоев ва жамоатчилик вакиллари иштирок этди.
Маҳалланинг янги биноси “SXF Samarqand сity” МЧЖ қурувчилари томонидан ҳомийлик асосида барпо этилиб, қурилиш ишларига 1 миллиард сўмдан ортиқ маблағ сарфланди.
Шунингдек, майинтепаликлар яна бир қулайликка эга бўлди. Маҳалла янги биноси ёнида жойлашган қишлоқ врачлик пунктининг эски, фойдаланилмаётган биноси қайта реконструкция қилиниб, туман тиббиёт бирлашмасига қарашли 43-сонли оилавий поликлиникасининг “Майинтепа” филиали фойдаланишга топширилди.
Филиал бир кунда 50 қатновга мослашган бўлиб, 5 турдаги тиббий хизмат кўрсатилади. Қарийб 10 йилга яқин фаолияти тўхтатилган мазкур муассаса бугундан аҳоли ихтиёрига топширилиб, зарур тиббий асбоб-ускуналар билан жиҳозланган.
