Самарқанд делегацияси "ZOV GROUP" компаниясидаги ишлаб чиқариш жараёни билан танишди
Гродно вилоятига ташриф доирасида Адиз Бобоев бошчилигидаги делегациямиз аъзолари Беларуснинг йирик мебель ишлаб чиқарувчиларидан бири – "ZOV GROUP" компаниясига борди.
Делегация вакилларига компаниянинг замонавий ускуналар ва автоматлаштирилган линиялар билан жиҳозланган ишлаб чиқариш қувватлари намойиш этилди. Айниқса, буюртма асосида мебель ишлаб чиқаришни ташкил этиш, замонавий дизайн ечимлари ҳамда материалларга ишлов бериш технологияларига алоҳида эътибор қаратилди.
Учрашув давомида томонлар мебель саноатида ҳамкорликни ривожлантириш истиқболлари юзасидан фикр алмашдилар. Шунингдек, замонавий ишлаб чиқариш технологияларини жорий этиш, корхоналар ўртасида кооперацияни йўлга қўйиш ҳамда вилоятда қўшма лойиҳаларни амалга ошириш имкониятлари муҳокама қилинди.
Учрашув якунида ҳамкорликнинг истиқболли йўналишларини батафсил ишлаб чиқиш ва икки ҳудуд бизнес вакиллари ўртасидаги ўзаро ҳамкорликни давом эттириш бўйича келишувга эришилди.
