Самарқандда био-иқтисодиёт йўналишида кадрлар тайёрланади
Тошкент давлат аграр университети Самарқанд филиалига Латвия қишлоқ хўжалиги вазири маслаҳатчиси Едвардс Ратниекс, Латвия Ҳаёт фанлари ва технологиялар университети проректори, профессор Aигарс Лаизанс, Ерасмус+ дастурининг БиоЕcУз (Ўзбекистонда барқарор био-иқтисодиёт бўйича янги магистратура ўқув дастурлари) лойиҳасининг бош координатори Ирина Кулитанелар келди.
Ўтказилган ҳамкорлик учрашувида томонлар филиал профессор-ўқитувчиларининг малакасини Латвия университетларида ошириш, махсус мутахассисликлар бўйича стажировкалар ташкил қилиш ҳамда қўшма таълим дастури бўйича олий таълимдан кейинги босқичларда биргаликда ҳозирги даврнинг энг долзарб соҳалари “Озиқ-овқат хавфсизлиги” ва “Био-иқтисодиёт” йўналишларида Ўзбекистон учун замонавий мутахассислар тайёрлашга келишиб олди.
Учрашувнинг бир қисми филиалда Ерасмус+ дастурининг БиоЕcУз (Ўзбекистонда барқарор био-иқтисодиёт бўйича янги магистратура ўқув дастурлари) лойиҳасини ривожлантиришга қаратилди. Лойиҳанинг бош координатори Латвия Ҳаёт фанлари ва технологиялари университети профессори Ирина Кулитане билан лойиҳанинг Ўзбекистондаги ҳамкор университетларидан келган вакиллар ва филиал профессор-ўқитувчилари келгусидаги фаолият ҳақида маслаҳатлашди.
Учрашувда ҳамкорликда ташкил қилинаётган био-иқтисодиёт йўналишидаги фанлар дастурлари, профессор-ўқитувчиларни тайёрлаш масалалари муҳокама қилинди. Бундан ташқари, лойиҳанинг ишчи пакетлари ижросини таъминлаш бўйича келишув амалга оширилди.
Маълумот ўрнида: БиоЕcУз (Ўзбекистонда барқарор био-иқтисодиёт бўйича янги магистратура ўқув дастурлари) лойиҳаси Ўзбекистондаги тўртта ҳамкор олий таълим муассасалари: Тошкент давлат аграр университети, Тошкент ирригация ва қишлоқ хўжалигини механизациялаш муҳандислари институти, Бухоро давлат университети ва Тошкент давлат аграр университети Самарқанд филиали иштирокида био-иқтисодиёт йўналишида 2022-2023 академик йилдан бошлаб магистратура йўналишида мутахассислар тайёрлаш мақсадида ташкил қилинган.
Тошкент давлат аграр университети
Самарқанд филиали ахборот хизмати.
