ТДАУ Самарқанд филиалида кореяликлар картошка уруғи етиштиришни йўлга қўяди
Тошкент давлат аграр университети Самарқанд филиалига Корея қишлоқ хўжалиги, озиқ-овқат ва қишлоқ муносабатлари вазирлиги (MAFRA)нинг Қишлоқ ҳудудларини ривожлантириш корпорацияси (KRC) томонидан делегация ташриф буюрди.
- Республика қишлоқ хўжалигидаги энг катта муаммолардан бири бу – картошка уруғчилиги, - деди филиал директори Шавкат Ҳасанов делегация вакилларига. - Ўзбекистон ҳар йили хориждан ўртача 20-25 млн. АҚШ доллари қийматидаги уруғлик картошка сотиб олади. Агар истеъмол учун импорт қилинган миқдорни ҳам қўшсак бу рақамлар бир неча бараварга ортади. Шу сабабли биз картошка уруғчилигини ривожлантириш, импорт ҳажмини камайтириш мақсадида ушбу лойиҳа концепциясини ишлаб чиқдик. Бу биринчидан, четдан келаётган уруғлик маҳсулотларини камайтиради, иккинчидан маҳаллий бозорда картошканинг нархини пасайтиради.
Ташқи савдо ва инвестициялар вазирлиги томонидан лойиҳамиз маъқулланиб, Корея ҳукуматига тақдим этилди. Кореялик ҳамкорлар филиал томонидан ишлаб чиқилган лойиҳага қизиқиш билдиргани сабабли шароитни ўрганиш мақсадида Ўзбекистонга келди.
Делегация вакиллари филиал раҳбарлари билан Ўзбекистон шароитида картошканинг сифатли маҳаллий шароитларга мос навлари, элита уруғларини етиштириш ҳақида мунозара олиб борди. Чет эллик мутахассислар филиалга ажратилган ер майдонларини кўздан кечирди, тупроқ унумдорлиги, ер ости ва ер устки сувларининг таркиби, ҳажми билан қизиқди.
Аслида ушбу лойиҳа бир йил олдин амалга оширилиши керак эди. Пандемия сабабли иш ортга сурилди. Лойиҳа тасдиқлангач, Корея томонидан филиалга уруғчилик етиштиришга мўлжалланган лаборатория ва иссиқхоналар қуриш учун маблағ ажратилади. Натижада картошка уруғи ўзимизда етиштирилади ва маҳаллий деҳқонлар картошка уруғини чет элдан сотиб олиш камаяди.
Маълумот учун: ТДАУ Самарқанд филиалига вилоят ҳокимлиги томонидан 50 гектар ер ажратилган. Ҳозир ушбу майдонда ғалла, интенсив боғ, нўхат, картошка, сабзавот экинлари, турли мевали кўчатлар тажриба тариқасида экилган.
Тошкент давлат аграр университети Самарқанд филиали ахборот хизмати.
