Самарқандда V Республика “Ёшлар форуми”га старт берилди
Самарқанд давлат ветеринария медицинаси, чорвачилик ва биотехнологиялар университетида анъанавий V Республика “Ёшлар форуми” ташкил этилди.
Унда университетнинг Нукус ва Тошкент филиаллари, техникумлар, академик лицей талаба ва ўқувчилари ҳамда маҳалла ёшлари қатнашди.
Ёшлар форуми доирасида “Раҳбар ва ёшлар” учрашувлари, “Талабалар театр студияси”, “Заковат” интеллектуал ўйини ҳамда стартап лойиҳалар танлови, шахмат бўйича “Қўмита раиси кубоги”, стол тенниси бўйича “Ректор кубоги”, волейбол бўйича “Ҳоким кубоги” ва футбол бўйича “Вазир кубоги” мусобақалари уюштирилди. Шунингдек, факультетлараро “Ибратли келин” кўрик танлови, миллий қадриятлар сайли доирасида миллий қадриятлар кўргазмаси, ўзбек миллий ўйинлари, миллий таомлар кўргазмаси, расмлар танлови, китобхонлик ва иншолар танловлари ташкил этилди.
Форум доирасида мазкур университет ва унинг филиалларидан келган талабалар ўртасида ветеринария соҳасида ўнта фандан фан олимпиадаси уюштирилди.
Бундан ташқари, битирувчилар бандлигини таъминлаш мақсадида “Карьера куни” тадбири бўлиб ўтди. Унда 51 та корхона ва ташкилот 800 га яқин иш ўринлари билан қатнашди ҳамда 370 дан ортиқ битирувчи билан ишга жойлашиш бўйича дастлабки келишувларга эришилди.
- Университетни 2025-2026 ўқув йилида жами 1254 нафар талаба битиради, - деди университет ректори, профессор Худойназар Юнусов. – Улардан ўзини ўзи банд қилган 77 нафар битирувчига “Келажакка қадам” дастури доирасида "Миллий банк"дан 1 миллиард 120 миллион сўм миқдорида имтиёзли кредитлар олишга кўмаклашдик.
Тадбирда" Миллий банк" АЖ Самарқанд вилояти раҳбари Отабек Умаров 810 миллион сўмлик имтиёзли кредитларни олишга эришган битирувчиларга сертификатлар топширди.
- Мен бугун 100 миллион сўмлик сертификатга эга бўлдим, - деди университетнинг битирувчи курс талабаси Азизбек Фарҳодов. – Ўзим Пайариқ туманиданман. Туманда ветеринар дорихонаси очиш бўйича бизнес-лойиҳа қилгандим. Университет кўмагида банкдан имтиёзли кредит олдим. Келажакда ушбу ветеринар дорихонасини янада кенгайтириш ва аҳолига сифатли хизмат қилишни мақсад қиляпман.
Форумда Ветеринария ва чорвачиликни ривожлантириш қўмитаси фан ва таълим соҳасини ривожлантириш бўлими бошлиғи Алишер Сафаров, вилоят ҳокимининг ўринбосари Ҳусан Тўхтаев ва бошқа масъуллар иштирок этди.
Форум эртага ҳам давом этади.
Хуршида Эрназарова.
