Самарқанддаги олий таълим муассасаларида “InnoWeek-2023” халқаро инновацион ғоялар ҳафталиги бўлиб ўтмоқда
“InnoWeek-2023” халқаро инновацион ғоялар ҳафталигига Самарқанд вилоятида ҳам старт берилди. Тадбирни вилоят ҳокимининг маслаҳатчиси Н.Ибрагимов ҳамда вилоят олий таълим, фан ва инновациялар бошқармаси ходимлари очиб берди.
Ҳафталик доирасида вилоятдаги 15 дан ортиқ давлат ва хусусий олий таълим муассасаларининг олимлари, касб-ҳунар мактаблари жамоаси, илмий тадқиқотчи ёшлар ва вилоят ишбилармонларининг турли учрашув ва семинарлари, стартап лойиҳа муаллифлари ва лойиҳа раҳбарларининг мастер-класслари, илмий-амалий конференциялар, турли тор ва кенг доирадаги учрашувлар, шартнома ва меморандумлар имзоланмоқда ҳамда инновацион маҳсулотлар кўргазмалари ташкил этилмоқда.
“InnoWeek-2023” ҳафталиги доирасида Самарқанд иқтисодиёт ва сервис институти талабалари томонидан 18 та стартап лойиҳалар тақдимоти қилинди ва ҳакамлар ҳайъати томонидан энг яхши 3 та лойиҳа саралаб олинди. Жумладан, 1-ўринни “Texnomuxlis.uz” лойиҳаси учун Анвар Шерназаров, 2-ўрин “Фраминг” лойиҳаси бўйича Умида Набиева, 3-ўрин “Perfekt servise” лойиҳаси учун Севинч Очилова ва Ноила Юлдашева қўлга киритди. Ғолиблар диплом ҳамда пул мукофоти билан тақдирланди.
“InnoWeek-2023” ҳафталиги доирасида СамДУ Ургут филиали профессор-ўқитувчилари ва талабалари томонидан “Смарт маҳалла” электрон дастури, “Ақлли гараж”, “Роборт қўл”, “Газ исини сезувчи детектор”, “Ҳавони тозаловчи мослама” ва “Ҳаракатланувчи қуёш панел” каби бир қанча инновацион лойиҳалар намойиш этилмоқда.
Самарқанд агроинновациялар ва тадқиқотлар институти ҳафталик доирасида “Антиоксидантларга бой нўхат уни”, “Зардобдан сариёғ ишлаб чиқариш”, “Мозорелле пишлоғи”, “Оқова сувларни тозалашга мослашган сув ўтларини кўпайтириш”, “Азолла ва рияска балиқлар учун тўйимли озуқа” каби стартап лойиҳалар билан қатнашмоқда.
Шунингдек, Самарқанд халқаро технология университети Ахборот технологиялари маркази сунъий интеллект ёрдамида дастурланган турли робототехника лойиҳаларини намойиш этди ва кўргазмада кўпчиликнинг эътиборини тортди.
Самарқанддаги бошқа олий таълим муассасаларида ҳам ҳафталик доирасида турли тадбирлар бўлиб ўтмоқда.
“InnoWeek-2023” халқаро инновацион ғоялар ҳафталиги 20 октябрга қадар давом этади.
