Samarqanddagi oliy ta’lim muassasalarida “InnoWeek-2023” xalqaro innovatsion g‘oyalar haftaligi bo‘lib o‘tmoqda
“InnoWeek-2023” xalqaro innovatsion g‘oyalar haftaligiga Samarqand viloyatida ham start berildi. Tadbirni viloyat hokimining maslahatchisi N.Ibragimov hamda viloyat oliy ta’lim, fan va innovatsiyalar boshqarmasi xodimlari ochib berdi.
Haftalik doirasida viloyatdagi 15 dan ortiq davlat va xususiy oliy ta’lim muassasalarining olimlari, kasb-hunar maktablari jamoasi, ilmiy tadqiqotchi yoshlar va viloyat ishbilarmonlarining turli uchrashuv va seminarlari, startap loyiha mualliflari va loyiha rahbarlarining master-klasslari, ilmiy-amaliy konferensiyalar, turli tor va keng doiradagi uchrashuvlar, shartnoma va memorandumlar imzolanmoqda hamda innovatsion mahsulotlar ko‘rgazmalari tashkil etilmoqda.
“InnoWeek-2023” haftaligi doirasida Samarqand iqtisodiyot va servis instituti talabalari tomonidan 18 ta startap loyihalar taqdimoti qilindi va hakamlar hay’ati tomonidan eng yaxshi 3 ta loyiha saralab olindi. Jumladan, 1-o‘rinni “Texnomuxlis.uz” loyihasi uchun Anvar Shernazarov, 2-o‘rin “Framing” loyihasi bo‘yicha Umida Nabiyeva, 3-o‘rin “Perfekt servise” loyihasi uchun Sevinch Ochilova va Noila Yuldasheva qo‘lga kiritdi. G‘oliblar diplom hamda pul mukofoti bilan taqdirlandi.
“InnoWeek-2023” haftaligi doirasida SamDU Urgut filiali professor-o‘qituvchilari va talabalari tomonidan “Smart mahalla” elektron dasturi, “Aqlli garaj”, “Robort qo‘l”, “Gaz isini sezuvchi detektor”, “Havoni tozalovchi moslama” va “Harakatlanuvchi quyosh panel” kabi bir qancha innovatsion loyihalar namoyish etilmoqda.
Samarqand agroinnovatsiyalar va tadqiqotlar instituti haftalik doirasida “Antioksidantlarga boy no‘xat uni”, “Zardobdan sariyog‘ ishlab chiqarish”, “Mozorelle pishlog‘i”, “Oqova suvlarni tozalashga moslashgan suv o‘tlarini ko‘paytirish”, “Azolla va riyaska baliqlar uchun to‘yimli ozuqa” kabi startap loyihalar bilan qatnashmoqda.
Shuningdek, Samarqand xalqaro texnologiya universiteti Axborot texnologiyalari markazi sun’iy intellekt yordamida dasturlangan turli robototexnika loyihalarini namoyish etdi va ko‘rgazmada ko‘pchilikning e’tiborini tortdi.
Samarqanddagi boshqa oliy ta’lim muassasalarida ham haftalik doirasida turli tadbirlar bo‘lib o‘tmoqda.
“InnoWeek-2023” xalqaro innovatsion g‘oyalar haftaligi 20 oktyabrga qadar davom etadi.
