Самарқанддан 187 минг киши ишлаш учун хориж давлатларига кетган

Бу ҳақда вилоят Матбуот уйида бўлиб ўтган матбуот анжуманида маълум қилинди.

Умуман, бугунги кунда вилоятимиздан 196 580 нафар фуқаро хорижий давлатларда ишлаш, ўқиш ва тадбиркорлик қилиш учун чиқиб кетган. Шундан Россия давлатига 132 021 нафар, Қозоғистонга 19 996 нафар, Туркияга 19 742 нафар, АҚШга 5 932 нафар, Жанубий Кореяга 3 834 нафар фуқаро кетган. Қолган фуқаролар Тожикистон, БАА ва бошқа давлатларда ишлаш учун борган.

Вилоятимиздан чиқиб кетган фуқароларнинг 187 091 нафари ишлаш учун кетган бўлса, 1 314 нафари ўқишга, 8 093 нафари бошқа мақсадларда кетган, - деди вилоят бандлик бош бошқармаси бошлиғи Нажмиддин Сулаймонов. – Хорижга ишлаш учун кетмоқчи бўлган фуқароларни касбга ва чет тилларига ўқитиш бўйича вилоятда битта “Ишга марҳамат” мономаркази, 5 та касб-ҳунарга ўқитиш марказлари ва 84 та маҳалла аҳолисини касб-ҳунарга ўқитиш масканлари ташкил этилган.

Хорижга ишлаш учун кетмоқчи бўлган 1,6 минг нафар фуқаро мазкур ўқув муассасаларида жорий йилнинг январ-апрель ойларида касбга ва чет тилларига ўқитилди. Шундан 1543 нафари 20 дан ортиқ турдаги касбларга ва 106 нафари рус, япон ва бошқа чет тилларга ўқитилди.

Йил якунига қадар вилоятда 5,2 минг нафар хорижга чиқиб кетаётган шахсларни касбга ва чет тилларига ўқитиш режалаштирилган. 

Ўқув жараёнини якунлаган 95 нафар фуқарога халқаро тан олинадиган “World Skills”, РХДУ (РУДН) ва япон тили бўйича сертификатлар берилди.

Х.Эрназарова.