“Сиздан яна кўп янги ташаббуслар кутамиз, сизга ишонамиз”

Президентимизнинг бу сўзлари менга янгича куч-ғайрат бағишлади, олдимга яна ҳам катта вазифаларни белгилаб, маррани баланд олиб ишлашга аҳд қилдим.

 Ватанимиз мустақиллиги халқимиз учун чиндан ҳам энг улуғ, энг азиз байрам. Бугунги авлод бунинг моҳиятини теран ҳис қилмаслиги мумкин, лекин икки тузумни кўрган биз каби катта авлод вакиллари давлат мустақиллиги, эрк ва озодликнинг қадр-қимматини жуда яхши англаймиз, буни юракдан ҳис қиламиз.

Мен бу байрамни яхши кўраман, ҳар йили орзиқиб кутаман, худди Янги йилда бир йиллик ҳаётимизни сарҳисоб қилганимиз каби Мустақиллик байрамида ҳам бир йиллик фаолиятимга назар солиб, нималарга улгурдим-у яна қандай ишларни қилишим керак, деб ўзимга савол бераман.

  Кейинги йилларда бундай кечинмалар кўнглимда анча эрта уйғонмоқда. Аниқроғи, давлатимиз раҳбари ташаббуси билан 20 август - Тадбиркорлар куни, деб белгилангач бу сана арафасида мен ҳам тадбиркор бўлиб, юртим тараққиётига ҳисса қўша оляпманми, Президент ишончига муносиб бўляпманми, деган ўй-хаёл тинчлик бермайди.

Беш йилдан буён 20 августда давлатимиз раҳбарининг тадбиркорлар билан мулоқотида қатнашаман. Ҳар сафар бу учрашувдан барча тадбиркорлар янгича руҳ, куч-қувват оламиз. Чунки бу очиқ мулоқотларда ўз таклифларимизни билдирамиз, юзага келаётган айрим муаммо ва камчиликларни айтамиз ва албатта, шу ернинг ўзида Президентимиз томонидан бу масалаларга ечим топиб берилади. Бунинг натижаси мамлакатимиз иқтисодиётининг жадал ривожланиб бораётганида, тадбиркорлик субъектлари сони кўпайиб, фаолияти кенгайиб бораётганида намоён бўлмоқда.

27 август куни давлат мукофотларини топшириш маросимида Президентимиз кейинги саккиз йилда ялпи ички маҳсулотимиз шиддат билан ўсиб, 115 миллиард АҚШ долларига етгани, Халқаро валюта жамғармаси прогнозига кўра, бу йил иқтисодиётимиз ҳажми 130 миллиард доллардан ошиши кутилаётганини мамнуният билан қайд этди. Ва биз учун аҳамиятлиси, бундай натижаларга тадбиркорлик кенг қўллаб-қувватланаётгани, замонавий саноат мажмуалари барпо этилаётгани замин бўлаётгани таъкидланди. Айнан шу каби омиллар туфайли мамлакатимизда саноат ҳажми 2017 йилдаги 29 миллиард доллардан бугунги келиб 70 миллиард долларга етказилди.

Давлатимиз раҳбари алоҳида таъкидлаганидек, агар вақтида тадбиркорлик учун қулай шароит яратиб берилмаганида бундай ютуқларга эришиш амримаҳол эди.

Қонимда ишбилармонлик бўлгани учун (раҳматли ота-онам бизни болалигимиздан тадбиркорлик, омилкорлик билан ишлашга ўргатган) кўп йиллар давлат идораларида ишлаб, тажриба орттирган бўлсам ҳам 1992 йилда фаолияти деярли тўхтаб қолган Самарқанд туманидаги экспериментал спорт қайиқлари заводида раҳбар сифатида иш бошладим. Спорт қайиқлари ишлаб чиқаришда ишлатиладиган хомашё Болтиқбўйи ва собиқ иттифоқ республикаларидан олиб келинар, улар билан алоқалар эса узилиб қолганди. Спорт қайиқларига ҳам эҳтиёж йўқ ҳисоби эди. Ана шундай шароитда заводда бошқа турдаги маҳсулотлар, қурилиш материаллари ишлаб чиқаришга киришдик, бозорни ўрганиб, талабга мос товарлар тайёрлашни ўргандик. Ўзимизда бўлган дастгоҳлар ёрдамида мебель ишлаб чиқаришни йўлга қўйдик. Кейин таълим муассасалари учун ўқув жиҳозлари, спорт инвентарлари, тиббиёт муассасаларига керакли мебель ва бошқа жиҳозларни ишлаб чиқаришни йўлга қўйдик. Шу тарзда эски завод фаолиятини тубдан ўзгартириб, “Стеклопластик” корхонасига асос солдик ва уни оёққа қўйдик. Маҳаллийлаштириш дастури жорий этила бошлагач, вилоятимиздаги йирик саноат корхоналари учун қарийб 20 хил бутловчи қисмлар ишлаб чиқара бошладик.

Ҳозир корхонамизда 200 дан ортиқ ишчи меҳнат қиляпти, 300 турдан кўпроқ маҳсулот тайёрлаяпмиз. Бир пайтлар тўхтаб қолган спорт қайиқлари ишлаб чиқаришни ҳам яна йўлга қўйдик ва энди хорижга ҳам экспорт қиляпмиз. Умуман, бугун ички бозорда ўз ўрнимизни топиб, яқин қўшни давлатларга ҳам таълим ва тиббиёт муассасалари учун жиҳозлар, спорт инвентарлари етказиб беряпмиз. Халқаро сифат сертификатларини қўлга киритдик ва дунёнинг турли давлатларида ўз маҳсулотларимиз билан кўргазмаларда қатнашяпмиз, буюртмалар оляпмиз. Ҳозир яна бир йирик лойиҳа устида ишлаяпмиз. Яъни, жаҳон чемпионатлари, Олимпия ва Паралимпия ўйинлари, нуфузли халқаро мусобақаларда фойдаланиладиган профессионал спорт инвентарлари ишлаб чиқаришни йўлга қўймоқчимиз. Албатта, бунинг ўзига яраша талаблари, халқаро стандартлар мавжуд. Бу борада хориждаги йирик компаниялар фаолиятини ўрганяпмиз ва насиб этса, йил якунигача янги лойиҳа асосида маҳсулот ишлаб чиқаришни йўлга қўямиз.

Тадбиркор бўлиб шуни англадимки, агар сизни давлат қўллаб-қувваламаса, ишлашингиз учун шароит ва имконият қилиб бермаса, ҳаракатларингиз ҳамма вақт ҳам кутилган натижани бермас экан. Шунинг учун юқорида таъкидлаганимдек, Президентимизнинг тадбиркорлар билан ҳар йили очиқ мулоқот қилиши, эркин ва самарали ишлашимиз учун шароит яратиб бераётгани муваффақиятларимизнинг бош омили бўлмоқда. Айниқса, кейинги саккиз йилда мамлакатимизда тадбиркорлик учун яратилган қулай муҳит, имтиёз ва енгилликлар аниқ мақсади ва озгина ҳаракати бор инсонни ҳақиқий ишбилармонга айлантирмоқда. Бунинг учун, албатта, иккита иш ўрни яратган тадбиркорни бошига кўтаришга тайёр Президентимиздан миннатдор бўлишимиз керак.

Мен яхши кўрадиган ва ҳар йили орзиқиб кутадиганим Мустақиллик байрами бу йил яна ҳам ўзгача, нафақат мен, балки жамоамиз учун юксак эътироф билан ўтмоқда. Байрам арафасида Президентимиз Фармони билан “Ўзбекистон Республикасида хизмат кўрсатган тадбиркор” унвонига лойиқ кўрилганим ва бу мукофотни шахсан давлатимиз раҳбари қўлидан олишим ҳаётимдаги энг ҳаяжонли лаҳза бўлди.

Президентимиз унвонни топшириш чоғида тадбиркорлик фаолиятимга муваффақият тилаб, “Сиздан яна кўп янги ташаббуслар кутамиз, сизга ишонамиз” дедилар. Ана шу сўзлар менга янгича куч-ғайрат бағишлади ва бундан буён олдимга яна ҳам катта вазифаларни белгилаб, маррани баланд олиб ишлашга аҳд қилдим.

Ўктам Саидмуродов,

Самарқанд туманидаги “Стеклопластик” МЧЖ кузатув кенгаши раиси, Ўзбекистон Республикасида хизмат кўрсатган тадбиркор.