“Sizdan yana ko‘p yangi tashabbuslar kutamiz, sizga ishonamiz”

Prezidentimizning bu so‘zlari menga yangicha kuch-g‘ayrat bag‘ishladi, oldimga yana ham katta vazifalarni belgilab, marrani baland olib ishlashga ahd qildim.

 Vatanimiz mustaqilligi xalqimiz uchun chindan ham eng ulug‘, eng aziz bayram. Bugungi avlod buning mohiyatini teran his qilmasligi mumkin, lekin ikki tuzumni ko‘rgan biz kabi katta avlod vakillari davlat mustaqilligi, erk va ozodlikning qadr-qimmatini juda yaxshi anglaymiz, buni yurakdan his qilamiz.

Men bu bayramni yaxshi ko‘raman, har yili orziqib kutaman, xuddi Yangi yilda bir yillik hayotimizni sarhisob qilganimiz kabi Mustaqillik bayramida ham bir yillik faoliyatimga nazar solib, nimalarga ulgurdim-u yana qanday ishlarni qilishim kerak, deb o‘zimga savol beraman.

  Keyingi yillarda bunday kechinmalar ko‘nglimda ancha erta uyg‘onmoqda. Aniqrog‘i, davlatimiz rahbari tashabbusi bilan 20 avgust - Tadbirkorlar kuni, deb belgilangach bu sana arafasida men ham tadbirkor bo‘lib, yurtim taraqqiyotiga hissa qo‘sha olyapmanmi, Prezident ishonchiga munosib bo‘lyapmanmi, degan o‘y-xayol tinchlik bermaydi.

Besh yildan buyon 20 avgustda davlatimiz rahbarining tadbirkorlar bilan muloqotida qatnashaman. Har safar bu uchrashuvdan barcha tadbirkorlar yangicha ruh, kuch-quvvat olamiz. Chunki bu ochiq muloqotlarda o‘z takliflarimizni bildiramiz, yuzaga kelayotgan ayrim muammo va kamchiliklarni aytamiz va albatta, shu yerning o‘zida Prezidentimiz tomonidan bu masalalarga yechim topib beriladi. Buning natijasi mamlakatimiz iqtisodiyotining jadal rivojlanib borayotganida, tadbirkorlik sub’yektlari soni ko‘payib, faoliyati kengayib borayotganida namoyon bo‘lmoqda.

27 avgust kuni davlat mukofotlarini topshirish marosimida Prezidentimiz keyingi sakkiz yilda yalpi ichki mahsulotimiz shiddat bilan o‘sib, 115 milliard AQSh dollariga yetgani, Xalqaro valyuta jamg‘armasi prognoziga ko‘ra, bu yil iqtisodiyotimiz hajmi 130 milliard dollardan oshishi kutilayotganini mamnuniyat bilan qayd etdi. Va biz uchun ahamiyatlisi, bunday natijalarga tadbirkorlik keng qo‘llab-quvvatlanayotgani, zamonaviy sanoat majmualari barpo etilayotgani zamin bo‘layotgani ta’kidlandi. Aynan shu kabi omillar tufayli mamlakatimizda sanoat hajmi 2017 yildagi 29 milliard dollardan bugungi kelib 70 milliard dollarga yetkazildi.

Davlatimiz rahbari alohida ta’kidlaganidek, agar vaqtida tadbirkorlik uchun qulay sharoit yaratib berilmaganida bunday yutuqlarga erishish amrimahol edi.

Qonimda ishbilarmonlik bo‘lgani uchun (rahmatli ota-onam bizni bolaligimizdan tadbirkorlik, omilkorlik bilan ishlashga o‘rgatgan) ko‘p yillar davlat idoralarida ishlab, tajriba orttirgan bo‘lsam ham 1992 yilda faoliyati deyarli to‘xtab qolgan Samarqand tumanidagi eksperimental sport qayiqlari zavodida rahbar sifatida ish boshladim. Sport qayiqlari ishlab chiqarishda ishlatiladigan xomashyo Boltiqbo‘yi va sobiq ittifoq respublikalaridan olib kelinar, ular bilan aloqalar esa uzilib qolgandi. Sport qayiqlariga ham ehtiyoj yo‘q hisobi edi. Ana shunday sharoitda zavodda boshqa turdagi mahsulotlar, qurilish materiallari ishlab chiqarishga kirishdik, bozorni o‘rganib, talabga mos tovarlar tayyorlashni o‘rgandik. O‘zimizda bo‘lgan dastgohlar yordamida mebel ishlab chiqarishni yo‘lga qo‘ydik. Keyin ta’lim muassasalari uchun o‘quv jihozlari, sport inventarlari, tibbiyot muassasalariga kerakli mebel va boshqa jihozlarni ishlab chiqarishni yo‘lga qo‘ydik. Shu tarzda eski zavod faoliyatini tubdan o‘zgartirib, “Stekloplastik” korxonasiga asos soldik va uni oyoqqa qo‘ydik. Mahalliylashtirish dasturi joriy etila boshlagach, viloyatimizdagi yirik sanoat korxonalari uchun qariyb 20 xil butlovchi qismlar ishlab chiqara boshladik.

Hozir korxonamizda 200 dan ortiq ishchi mehnat qilyapti, 300 turdan ko‘proq mahsulot tayyorlayapmiz. Bir paytlar to‘xtab qolgan sport qayiqlari ishlab chiqarishni ham yana yo‘lga qo‘ydik va endi xorijga ham eksport qilyapmiz. Umuman, bugun ichki bozorda o‘z o‘rnimizni topib, yaqin qo‘shni davlatlarga ham ta’lim va tibbiyot muassasalari uchun jihozlar, sport inventarlari yetkazib beryapmiz. Xalqaro sifat sertifikatlarini qo‘lga kiritdik va dunyoning turli davlatlarida o‘z mahsulotlarimiz bilan ko‘rgazmalarda qatnashyapmiz, buyurtmalar olyapmiz. Hozir yana bir yirik loyiha ustida ishlayapmiz. Ya’ni, jahon chempionatlari, Olimpiya va Paralimpiya o‘yinlari, nufuzli xalqaro musobaqalarda foydalaniladigan professional sport inventarlari ishlab chiqarishni yo‘lga qo‘ymoqchimiz. Albatta, buning o‘ziga yarasha talablari, xalqaro standartlar mavjud. Bu borada xorijdagi yirik kompaniyalar faoliyatini o‘rganyapmiz va nasib etsa, yil yakunigacha yangi loyiha asosida mahsulot ishlab chiqarishni yo‘lga qo‘yamiz.

Tadbirkor bo‘lib shuni angladimki, agar sizni davlat qo‘llab-quvvalamasa, ishlashingiz uchun sharoit va imkoniyat qilib bermasa, harakatlaringiz hamma vaqt ham kutilgan natijani bermas ekan. Shuning uchun yuqorida ta’kidlaganimdek, Prezidentimizning tadbirkorlar bilan har yili ochiq muloqot qilishi, erkin va samarali ishlashimiz uchun sharoit yaratib berayotgani muvaffaqiyatlarimizning bosh omili bo‘lmoqda. Ayniqsa, keyingi sakkiz yilda mamlakatimizda tadbirkorlik uchun yaratilgan qulay muhit, imtiyoz va yengilliklar aniq maqsadi va ozgina harakati bor insonni haqiqiy ishbilarmonga aylantirmoqda. Buning uchun, albatta, ikkita ish o‘rni yaratgan tadbirkorni boshiga ko‘tarishga tayyor Prezidentimizdan minnatdor bo‘lishimiz kerak.

Men yaxshi ko‘radigan va har yili orziqib kutadiganim Mustaqillik bayrami bu yil yana ham o‘zgacha, nafaqat men, balki jamoamiz uchun yuksak e’tirof bilan o‘tmoqda. Bayram arafasida Prezidentimiz Farmoni bilan “O‘zbekiston Respublikasida xizmat ko‘rsatgan tadbirkor” unvoniga loyiq ko‘rilganim va bu mukofotni shaxsan davlatimiz rahbari qo‘lidan olishim hayotimdagi eng hayajonli lahza bo‘ldi.

Prezidentimiz unvonni topshirish chog‘ida tadbirkorlik faoliyatimga muvaffaqiyat tilab, “Sizdan yana ko‘p yangi tashabbuslar kutamiz, sizga ishonamiz” dedilar. Ana shu so‘zlar menga yangicha kuch-g‘ayrat bag‘ishladi va bundan buyon oldimga yana ham katta vazifalarni belgilab, marrani baland olib ishlashga ahd qildim.

O‘ktam Saidmurodov,

Samarqand tumanidagi “Stekloplastik” MChJ kuzatuv kengashi raisi, O‘zbekiston Respublikasida xizmat ko‘rsatgan tadbirkor.