Спорт хабарлари
Баскетбол
Самарқанд шаҳрида баскетбол бўйича ўғил болалар ўртасида Ўзбекистон чемпионатининг 1-тур мусобақалари ўтказилди.
Тур якунига кўра, Наманган вилояти жамоаси биринчи ўринни қўлга киритди. Вилоятимиз баскетболчилари, Самарқанд-2 жамоаси иккинчи ва учинчи ўринларни эгалашди.
Чим устида хоккей
Самарқанд шаҳрида чим устида хоккей бўйича эркаклар ўртасида Ўзбекистон кубоги мусобақаси бўлиб ўтди.
Муросасиз кечган баҳс якунида вилоятимиз спортчилари кубок эгаси бўлди. Андижон ҳамда Хоразм вилояти вакиллари иккинчи ва учинчи ўринларни эгаллади.
Волейбол
Тойлоқ туманида волейбол бўйича ўсмир қиз ва ўғил болалар ўртасида вилоят чемпионати ўтказилди.
Мусобақада шаҳар ва туманлардан келган жамоалар ўзаро баҳс олиб борди. Ўғил болалар баҳси якунида Самарқанд шаҳар жамоаси биринчи ўринни эгаллади. Ургут ҳамда Тойлоқ тумани волейболчиларига иккинчи ва учинчи ўринлар насиб этди. Қизлар беллашувида нурободликларга тенг келадигани топилмади. Ургутлик ва тойлоқликлар эса иккинчи учинчи ўринларни банд қилди.
Аҳрор ШАМСИЕВ.
Миллий кураш
Жомбой туманида 2006-2007 йилларда туғилган ўғил болалар ўртасида миллий кураш бўйича вилоят чемпионати бўлиб ўтди. Унда 150 нафарга яқин ёш полвонлар ғолиблик учун гиламда бел олишди.
Қизиқарли ва муросасиз ўтган мусобақа якунида Х.Бурхонов, Д.Асрорқулов, Б.Шодиқулов, Ж.Каримов, А.Облоқулов, О.Мажидов, О.Сайдуллаев, Х.Ирисқулов, О.Бозоров, И.Асроров ўз вазн тоифасида барча рақибларини енгиб, биринчи ўринга сазовор бўлди.
Мини футбол
Самарқанд шаҳрида мактаб ўқувчилари ўртасида мини футбол бўйича вилоят биринчилиги мусобақаси ташкил этилди.
Шаҳар ва туман мактаблари жамоалари майдонда ўзаро тўп суришди. Якунда Иштихон тумани жамоси биринчи ўринни қўлга киритди. Иккинчи ўринни Самарқанд шаҳри футбол академияси жамоаси эгаллаган бўлса, учинчи ўрин Ургут тумани жамоасига насиб этди.
Спорт гамнастикаси
Вилоят гимнастика бўйича ихтисослаштирилган болалар-ўсмирлар спорт мактабида 2007 йилда туғилган ва ундан кичик ёшдаги 100 нафарга яқин мактаб ўқувчилари ўртасида спорт гимнастикаси бўйича вилоят биринчилиги бўлиб ўтди.
Қизлар ўртасидаги баҳс якунига кўра, Дилнура Иброҳимова, Малика Ҳошимова, Аниса Рофиева, Сакина Эшбоева ва Ирода Фахриддинова энг яхши натижа кўрсатиб, биринчиликни эгаллади.
Ўғил болалар баҳсида эса Камрон Воҳобжонов, Арслон Мўминов, Дамир Дўстмуродов, Давлат Юлдошев, Беҳруз Нарзуллаев маҳорат бобида рақибларидан устун келди.
Бекзод АҲМЕДОВ.
