Турсуной ая 82 ёшида паспорт олди

1941 йилда туғилган Турсуной Эшонқуловага ота-онаси ўша пайтда “Метрика” деб аталувчи туғилганлик ҳақида гувоҳнома олмаган. Тўғри, ўша пайтлар бу ҳужжат кейинроқ ҳам олинаверган. Қачондир ҳужжат керак бўлганда оиланинг каттаси давлат идорасига бориб ҳужжат олган.

Аммо Турсуной Эшонқуловага ҳужжат олиш ҳеч кимнинг эсига келмаган. Балоғат ёшига етганида “метрика” бўлмагани учун паспорт ҳам ололмаган. Қишлоқчилик, ҳужжат тўғрилашга ҳаракат қилганида ҳам бирламчи ҳужжат бўлмагани учун ҳеч бир идорада иши битмаган. Шу тариқа бир умр ҳужжатсиз яшаб 82 ёшга кирди.

Бу йилларда Т. Эшонқулова ҳужжатсизлик ортидан жуда кўп қийинчиликларни бошдан кечирди. Мактабда ўқиб, аттестат ололмади, қонуний ишга киролмади, пенсия масаласи ҳам муаммо бўлди. Энг ёмони, яшаб турган давлатнинг, ватанингнинг қонуний фуқароси деган ҳужжат бўлмаса кўнгил ҳам кемтик бўларкан.

Кейинги йилларда амалга оширилаётган ислоҳотлар кўп чигал масалаларни енгиллаштирди. Бундан руҳланган Турсуной Эшонқулова туғилганлик гувоҳномаси ва паспорт олишда кўмак сўраб ҳуқуқ-тартибот органларига мурожаат қилди. Туман адлия бўлими томонидан киритилган аризага мувофиқ, фуқаролик ишлари бўйича Иштихон тумани суди томонидан туғилганлик факти белгиланди. Натижада, ФҲДЁ бўлими онахонга туғилганлик гувоҳномасини, туман ИИБ эса фуқаролик паспортини расмийлаштириб берди.

Фурқат Аноров,
фуқаролик ишлари бўйича Иштихон туманлараро суди судьяси.