Урганжиликлардан ўрганиш керак
Аҳоли сони 3 минг 220 нафарни ташкил қилган Урганжида тадбиркорлар кўп, деб эшитгандик. Маҳаллага келиб, энг аввало, улар билан қизиқдик. Маҳалла раиси Ўктам Аҳроров оилавий тадбиркорлик билан шуғулланаётган бир неча кишини номма-ном санади. Дастлаб 2 сотих майдондаги иссиқхонасида гул парваришлаётган Алишер Зарипов хонадонига йўл олдик.
– Айни пайтда гулхонамизда 200 хилга яқин гул парваришлаяпмиз, – дейди Алишер ака. – Касбим фармацевт. Бу гулхонани Самарқандда машҳур гулчи, отам Аҳрор Зарипов барпо қилганлар. У кишининг вафотларидан кейин ишларини давом эттиряпман. Гулларни бозорга олиб чиқмайман, уларнинг таърифини эшитган кишилар ўзлари қидириб келишади. Мактаб, коллежлардан буюртмалар бўлади. Невараларим яқин кўмакчиларим, дарсдан бўш вақтларида улар билан иссиқхонада ишлаймиз.
Алишер аканинг гулхонасида кактусларнинг 15 хили, хушбўй каллизия, бегония, фикус, папоротник, оксалис (кислица)нинг бир неча турларидан ташқари, агава, цикас, абутилон, алоказая каби ноёб гуллар, пальма ва банан дарахти бор. Қаҳратон совуқ кунлари гуллар учун мўътадил ҳароратни сақлаб туриш жуда муҳим. Бунинг учун иссиқхонадаги ҳарорат +1 дан тушмаслиги керак.
Қиш фасли ўртасида яшнаб турган гулхонани тарк этиб, ҳунарманд Дилшод Саматовнинг юнон тарихий обидаларини эслатувчи баланд устунлар териб қўйилган устахонасига келдик. Дилшод ака декоратив устунлар ишлаб чиқариш билан шуғулланади. Фаолиятини бошлаганига 20 йилдан ошган бўлса, шу вақтга қадар 30 нафардан ортиқ шогирд тайёрлаган. Устанинг мутахассислиги қурилиш соҳаси билан боғлиқлиги учун ҳам у ишини профессионал даражада бажаради.
– Иш бошлаган пайтларимизда буюртмаларни давлат ташкилотлари, ресторанлардан олган бўлсак, бугун хусусий уй-жойлар учун ҳам буюртма қабул қиляпмиз, – дейди Дилшод Саматов. – Бу ҳам халқимизнинг турмуш даражаси ошиб бораётганидан далолат. Келажакда цехимизни кенгайтириб, маҳсулот турини кўпайтирмоқчимиз.
Озод Тўрақулов ихчамгина томорқасида иссиқхона барпо этиб, тежамкор усулда лимон етиштираётганига 10 йил бўлди. Сафо Одилов ҳам нафақага чиққач, лимон парваришлай бошлади. Мана, лимончилар ҳам маҳалланинг ўзидан. Бедана боқиб, аҳолини парҳез маҳсулотлари билан таъминлашга бел боғлаган йигитлар ҳақида ҳам гапиришди.
Яқин кунларда маҳалла марказида ишга тушадиган савдо-хизмат кўрсатиш мажмуаси оилавий тадбиркорлар томонидан бунёд этилган. Тадбиркорлардан бири маҳаллани "Сиёб деҳқон бозори" ва туман маркази билан боғлайдиган жамоат транспортини йўлга қўйиш ҳаракатида.
Халқимизда "Ҳурмат қилсанг, ҳурмат кўрасан, меҳнат қилсанг, даврон сурасан", деган мақол бор. Ҳар жабҳада илғор, меҳнатдан қочмайдиган урганжиликлардан ўрнак олсак арзийди.
Зилола ОМОНОВА.
