Вилоят бўйича 6 ойда алимент юзасидан 9 мингга яқин мурожаатлар келиб тушган: Мажбурий ижро бюроси

Йилнинг дастлабки ярмида Мажбурий ижро юроси Самарқанд вилоят бошқармасига 13 мингдан зиёд мурожаатлар келиб тушган бўлса, шундан алимент ундирувларига оид мурожаатлар 8 минг 982 тани ташкил қилади. Бу ҳақда zarnews.uz`га бошқарма катта инспектори Рустам Хўжақулов маълум қилди.

Унга кўра, келиб тушган умумий мурожаатларнинг 11 минг 838 таси ҳал этилган, алимент бўйича мурожаатларнинг эса 5 минг 612 таси қаноатлантирилган —қарийб 10 миллиард сўмлик пул маблағлари ундириб берилган.

Бошқарма вакили ўз вақтида тўланмаган алимент учун қатор ҳуқуқий оқибатлар мавжудлигини эслатиб ўтади.

Хусусан, фуқаро К.Н.нинг алимент ундирувига оид суд қарори ижроси таъминланмаётганлигидан ҳақидаги мурожаати ўрганиб чиқилган. Фуқаролик ишлари бўйича Каттақўрғон туманлараро судининг қарздор Б.Н.дан ундирувчи К.Н.нинг фойдасига уч нафар вояга етмаган фарзандларининг моддий таъминоти учун қарздорнинг ойлик иш ҳақи ва бошқа даромадларидан иккидан бир қисми миқдорида алимент ундириш тўғрисидаги ижро ҳужжати Бюронинг Нарпай туман бўлими иш юритувига келиб тушган ва ижрога қаратилган.

Аммо қарздор мазкур алимент қарздорлигини ихтиёрий бартараф қилиши тўғрисида бир неча маротаба расмий огоҳлантириш берилган бўлишига қарамасдан, алиментдан юзага келган 60 млн. 862 минг сўм қаздорликни тўлашдан бўйин товлаб келган. Шундан сўнг, тўпланган материаллар жиноят ишлари бўйича туман судига юборилган ва суднинг қарорига асосан 15 сутка маъмурий қамоқ жазоси тайинланган.