Хитой АҚШнинг Шинжондан импорт қилишни тақиқловчи қонунига қарши кескин норозилик билдирди

Пекин Вашингтонни Хитой ички ишларига аралашишни бас қилиш ва хатоларни тузатишга чақиради, дейилади Хитой Ташқи ишлар вазирлиги баёнотида.

Эслатиб ўтамиз, АҚШ президенти Жо Байден Хитойнинг Шинжон-Уйғур автоном вилоятидан импорт қилишни тақиқловчи ва минтақада мажбурий меҳнатдан фойдаланишга дахлдор шахсларни жазолаш тўғрисидаги қонунни имзолаган эди.

"Қонун лойиҳаси фактларни эътиборсиз қолдиради, Хитой Шинжонидаги инсон ҳуқуқлари аҳволини ғаразли равишда қоралайди, халқаро ҳуқуқ ва муносабатларнинг асосий меъёрларини қўпол бузади. Бир сўз билан айтганда, ҳужжат Хитой ички ишларига қўпол аралашувига айланди. Хитой бунга кескин қарши", - дейилади Хитой ТИВ баёнотида.

Қайд этилишича, “Миш-миш тўқиш ва можароларни қўзғаш учун Шинжон кўп бора АҚШга қўл келган, аслида эса улар инсон ҳуқуқлари баҳонасида сиёсий манипуляция ва иқтисодий таъқиб билан шуғулланган. Шинжон барқарорлиги ва фаровонлигига путур етказишга уринган, хуллас, Хитой ривожига ғов бўлган".

АҚШ расмийлари эса аввалроқ Хитойнинг уйғурларга қарши ҳаракатларини геноцид сифатида баҳолаш мумкинлигини айтишган эди. Пекин барча айбловларни қатъиян рад этиб, келажакда вазият ривожига қараб муносабат билдириши билдирмоқда.