АҚШ–Венесуэла: сиёсий ва ҳарбий кескинлик ортиб бормоқда

БМТ Бош котиби Антониу Гутерриш АҚШ ва Венесуэлани вазминликка риоя қилишга ҳамда вазиятни деэскалация қилишга интилишга чақирди. Бу ҳақда БМТ раҳбарининг расмий вакили ўринбосари Фарҳон Ҳақ брифинг чоғида маълум қилди.

Шу билан бирга, АҚШнинг собиқ президенти Дональд Трамп Венесуэла масаласи бўйича баёнот бериб, мамлакат “АҚШнинг нефтини ноқонуний равишда олиб қўйгани”ни таъкидлади.

«Улар бизнинг барча нефтимизни олиб қўйишди ва биз уни қайтариб олишни истаймиз. Улар буни ноқонуний тарзда қилган», деди Трамп. Унинг сўзларига кўра, бу ҳолат аввалги маъмурият даврида вазият устидан етарли назорат бўлмагани билан боғлиқ.

Маълумот учун, АҚШ ва Венесуэла ўртасидаги кескинлик бир неча йил олдин Венесуэладаги сиёсий инқироз, ҳукумат масаласидаги баҳслар ҳамда нефть соҳасига нисбатан жорий этилган санкциялар ортидан кучайган.

Айни пайтда икки мамлакат ўртасидаги муносабатлар ўта кескин конфронтация босқичида қолмоқда. АҚШ томонидан Николас Мадуро режимига қарши кенг кўламли санкциялар жорий этилган, наркотерроризмда айбловлар илгари сурилган, Кариб ҳавзасида АҚШ ҳарбий ҳаракатлари кучайтирилган ҳамда Венесуэлага тегишли активлар, жумладан нефть ташувчи танкерлар мусодара қилинган. Ўз навбатида, Венесуэла АҚШни қўпол куч ишлатиш, денгизда қўлланилаётган қароқчилик ва мамлакат суверенитетига таҳдидда айбламоқда.

Айни дамда Венесуэла эҳтимолий ҳарбий тўқнашувга тайёргарлик кўрмоқда. Мамлакат ҳарбий кемалари нефть танкерларини ҳимоя қилиш учун АҚШ флотига қарши денгизга чиққан.