Хориж воқеалари қисқа хабарларда: КХДР Жанубий Корея чегарасида армияни шай ҳолатга келтирди
🔹 Пекин Тайвань президентини Миллий байрам муносабати билан қилган мурожаатида мустақилликни тарғиб қилганидан норозилик билдирди. Айни вақтда Хитой Тайвань ороли атрофида ҳарбий машғулотларни бошлаган.
🔹 Шимолий Корея Жанубий Корея билан чегарадаги артиллерия кучларига шай туришни буюрди. КХДРда қайд этилганидек, вазиятнинг кескинлашувига Жанубий Корея дронларининг бир ойда уч марта Пхеньян томон юборилгани ва варақа тарқатгани сабаб бўлган. Шунингдек, Шимолий Корея Сеул билан асосий алоқа линиялари яқинидаги йўлларни портлатмоқчи. Жанубий Корея расмийлари ҳам армия ҳар қандай тажовузга жавоб беришга тайёр эканини маълум қилган.
🔹 Исроил армиясининг сўнгги 24 соат ичида Ливанга берган зарбалари оқибатида 51 киши ҳалок бўлган, 174 киши яраланган. Ҳаво ҳужумлари ва артиллерия ўқлари натижасида ҳалок бўлганлар сони 2306 кишига етган, 10,6 минг киши жароҳат олган.
🔹 Кеча Ҳизбуллоҳнинг дронлари Ҳайфадаги Исроил армияси базасига зарба бериши оқибатида 3 нафар исроиллик ҳарбий ҳалок бўлган, 39 нафари яраланган, улардан 9 нафарининг аҳволи оғир. Дронлар Исроил ҳаво мудофаа тизимини четлаб ўтган.
🔹 АҚШда қуролланган шахс Доналд Трампнинг Калифорния штатида нуқ сўзлаши кутилаётган жой яқинида қўлга олинган. Унинг мақсади ўрганилмоқда.
🔹 Эронда оммавий заҳарланиш содир бўлди. Метил спирти истеъмолидан 48 киши ҳалок бўлган. Зарарли моддани ишлаб чиқарувчи ва сотувчилар ҳибсга олинган.
🔹 Демократик партиядан президентликка номзод Камала Харрисни 76 миллиардер, унинг рақиби республикачи Доналд Трампни эса 49 нафар миллиардер қўллаб-қувватламоқда.
🔹 Исроил Бош вазири Бинямин Нетаняҳу БМТ Бош котиби Антониу Гутерришга мурожаат қилиб, БМТнинг Ливандаги Муваққат кучлари тинчликпарвар кучларини Ливан-Исроил чегарасидаги жанговар зонадан зудлик билан олиб чиқишни талаб қилди. Олдинроқ Исроил ҳарбийлари Ливандаги БМТ тинчликпарвар кучларига зарба берган ва дунёнинг турли давлатлари томонидан танқидга учраганди.
🔹 Туркияда қишлоқ хўжалиги ишчиларини олиб кетаётган микроавтобус ағдарилиб кетди: 2 киши ҳалок бўлган, 13 киши яраланган.
