Хориж воқеалари қисқа хабарларда: Рекорд катталикдаги иккинчи «қора туйнук» топилди. Йирик сув тошқинлари ортидан Дубай аэропортида ўнлаб рейс кечиктирилган
🔹 Грузия президенти Саломе Зурабишвили "Хорижий агентлар тўғрисидаги қонунга" вето қўйишини маълум қилди.
🔹Қозоғистон президенти Қосим-Жўмарт Тўқаев мамлакатдаги йирик сув тошқинлари фонида ҳукуматга бюджет маблағларини тежаш ва йирик тадбирларни ўтказишдан воз кечишни буюрди.
🔹 Қўшма Штатлар G7 давлатлари билан Эроннинг ракета ва дрон дастурларига қаратилган санкцияларни киритиши кутилмоқда.
🔹 Украина ИИВга кўра, Россиянинг Черниговга ракета ҳужуми оқибатида ҳалок бўлганлар сони 13 нафарга етган, улар орасида 2 бола бор, 60 дан ортиқ киши жароҳатланган. Россия ҳарбийлари Черниговга учта ракета зарбаси берган.
🔹 Россия қўшинлари Тоғли Қорабоғдан олиб чиқиб кетилмоқда.
🔹 Америкалик тадбиркор Илон Маск АҚШнинг амалдаги раҳбарияти олиб бораётган миграция сиёсатини ақлдан озиш, деб атади. Гап Нью-Йоркдаги ноқонуний мигрантлар митинги ҳақида кетмоқда. Намойишга минглаб одамлар қўшилган. Янги келганлар АҚШда доимий уй-жой ва ишлаш учун рухсатнома талаб қилиб кўчаларга чиққан.
🔹 Дубайда кучли ёмғир туфайли дунёдаги энг йирик савдо марказларидан бири сув остида қолди. БАА тижорат пойтахти ўзининг қисқа тарихида ҳеч қачон бунақасини кўрмаган. Дубай аэропортида 17 та рейс кечиктирилган.
🔹 Украина Қуролли кучлари Қримдаги ҳарбий аэродромга ҳужум қилди
🔹 Эроннинг Исроилга уюштирган жавоб зарбаси учун биринчи навбатда Исроил Бош вазири Бенямин Нетаняҳу жавобгар. Бу ҳақда Туркия президенти Ражаб Тоййиб Эрдўғон халққа мурожаатида айтган. Нетаняҳу ўзининг сиёсий ҳаётини узайтириш учун ўз фуқаролари ва минтақадаги барча одамлар ҳаётини хавф остига қўймоқда, деган у.
🔹 Хитой 2027 йилгача электр станциялари учун захира кўмир қувватини яратиш режасини ишлаб чиқмоқда. Йилига 4 миллиард тоннадан ортиқ кўмир ёқадиган мамлакат учун захиралар унчалик катта бўлмаса-да, 2030 йилга бориб 300 миллион тонна захира тўплаш кўзда тутилган.
🔹 Ерга яқин жойда рекорд катталикдаги иккинчи қора туйнук топилди. Бу Сомон йўлида топилган энг катта объект ва бизнинг галактикамизда Ерга энг яқин иккинчи қора туйнук ҳисобланади.
