ЮНЕСКОнинг янги бош директори сайланди
ЮНЕСКО Бош конференция 43-сессиясининг бугун ўтказилган навбатдаги ялпи мажлисида ташкилотга янги бош директор сайланди.
Жорий йилнинг 6 октябрь куни ЮНЕСКО Ижроия қўмитасининг 222-сессиясида ташкилотнинг янги Бош директори лавозимига мисрлик Холид Аҳмад ал-Ананий номзоди кўрсатилган ва у 58 овоздан 55 тасини олган эди.
Бугун ташкилотга аъзо давлатлар вакиллари Холид ал-Ананийни ЮНЕСКО Бош директори лавозимига сайладилар ва у ташкилотнинг 12-бош директори сифатида ноябрь ойининг ўрталарида ўз фаолиятини бошлайди.
Мажлисда Холид ан-Ананий сўзга чиқиб, билдирилган ишонч учун миннатдорлик билдирди ҳамда дунё бўйлаб ЮНЕСКОнинг мақсад ва эзгу ғояларини амалга оширишда ташкилотга аъзо давлатлар ва халқаро ташкилотлар билан ҳамжиҳатликда ишлашини билдирди.
Холид Аҳмад ал-Ананий 1971 йилда туғилган. Франциядаги Монпелье Поль-Валери университетида мисршунослик бўйича докторлик даражасига эга бўлган. У 2014-2016 йилларда Миср цивилизацияси миллий музейини бошқарган, 2016 йилдан 2022 йилгача Миср Араб Республикаси қадимий ёдгорликларни муҳофаза қилиш вазири, кейин эса туризм ва қадимий ёдгорликларни муҳофаза қилиш вазири сифатида фаолият кўрсатган.
Холид ал-Ананий Бош директор лавозимига расман тасдиқланганидан сўнг “Келажак таълими”, “Интеллектуал мерос”, “Биохилма-хиллик”, “Этика ва сунъий интеллект” каби йўналишларга алоҳида эътибор қаратишини маълум қилганди.
Эслатиб ўтамиз, ЮНЕСКОни 2017 йилдан буён франциялик Одри Азуле хоним бошқариб келаётган эди ва у икки муддат ташкилот бош директори этиб сайланганди. 5 ноябрь куни Одри Азуле хоним 43-сессия ўнинчи мажлисида ўзининг якуний ҳисобот маърузасини тақдим этганди.
