Zarnews.uz да хабар берилгандан сўнг...

21 апрель куни zarnews.uz сайтида “Икки кундан бери уйимизнинг лифтлари ишламаяпти?” номли мурожаат берилди.

Унда Самарқанд шаҳри Қорасув массивидаги 7-кўп қаватли уйда истиқомат қилувчи И.Довурбекова, К.Каттаев ва бошқалар янги уйларнинг лифтлари ишламаётганидан шикоят қилиб, одамлар, айниқса, кексалар, ҳомиладор аёллар ва ёш болалар хонадонларига чиқиб-тушишга қийналишаётгани ҳақида ёзиб, “Муаммога ечим топадиган ташкилот борми?” дея иддао қилишган эди.

Бу мурожаатга Самарқанд вилоят уй-жой коммунал хизмат кўрсатиш бошқармаси бош мутахассиси Ҳусниддин Шодиев муносабат билдириб, ушбу уйда яшовчи фуқаролар коммунал тўловлардан катта миқдорда қарз эканини, шунингдек, мурожаатда айтилган манзилдаги уй аҳолисининг деярли ҳаммаси ширкатга тўланадиган мажбурий бадал тўловларини тўламаганини, натижада ширкат лифтни ишлатиш учун электр энергияси тўловини амалга ошира олмаётгани учун лифтлар тўхтатиб қўйилганини билдирганди. Шундай бўлса-да лифтлар мурожаатдан сўнг ишлати қўйилган ва уйда яшовчилардан тўловлар ўз вақтида амалга ошириш сўралганди.

zarnews.uz сайти мурожаатни ҳам, мутахассис муносабатини ҳам эълон қилган эди.

Ушбу чиқишлардан кейин аҳоли электр энергияси учун ва ширкатнинг бадал тўловларидан қарзларини тўлагани ҳақида хабар олдик.

Самарқанд вилоят уй-жой коммунал хизмат кўрсатиш бошқармаси ахборот хизмати.