Bo‘lgan voqea: Tanish chehra

Avtobus to‘xtadi. Derazadan tashqariga termulib ketayotgan qizning qarshisiga bir nechta og‘ir sumka ko‘tarib olgan ayol to‘xtadi.

Qiz o‘ziga qarab-qarab qo‘yayotgan xotinga ko‘zi tushishi bilan teskari qarab oldi.

- Darsdan charchab chiqqan bo‘lsam... Shahar katta bo‘lsa. Bu xolani qaytib ko‘rarmidim, - o‘ziga-o‘zi pichirladi.

Biroq yana bir necha kundan keyin xuddi o‘sha xolani ko‘rdi. Faqat rasmini...

Tug‘ilgan kuniga atab bir quchoq atirgul olib kelgan yigit sekin shivirladi:

- Sen onam orzu qilganday kelin bo‘lasan! Onam ham juda mehribon ayol. Senga suratlarini ko‘rsataymi?

Rasmdagi ayol u avtobusda ko‘rgan o‘sha onaxon edi...

Zilola G‘aybullayeva.