Bugun Vashingtonda Bayden va Zelenskiy uchrashadi

Ukraina prezidenti Vladimir Zelenskiy Vashingtonga tashrifi davomida AQSh prezidenti Jo Bayden bilan uchrashadi, hozirda ularning uchrashuvi rejasi ishlab chiqilmoqda. Bu haqda seshanba kuni CNN telekanali xabar berdi.

“Aftidan, u [Зеленский] prezident Baydenga shaxsan murojaat qila oladi, hozirda prezident Zelenskiy Oq uyga tashrif buyurib, prezident Bayden bilan shaxsan uchrashishi rejalashtirilmoqda”, — dedi jurnalist jonli efirda.

Uning ta’kidlashicha, Zelenskiyning Vashingtonga tashrifi AQShning Ukrainaga yangi harbiy yordam paketi e’lon qilinishi bilan bir vaqtga to‘g‘ri keladi. Shu bilan birga, “Patriot” raketaga qarshi mudofaa tizimlarini yetkazib berish bo‘yicha qaror hali qabul qilinmagan.

Kecha ertalab Axios portali manbalarga tayanib, Zelenskiy 21 dekabr kuni Vashingtonga tashrif buyurishi hamda AQSh Kongressi Vakillar palatasi va Senatining qo‘shma yig‘ilishida nutq so‘zlashi haqida xabar bergan edi. U Ukrainaga ko‘rsatilayotgan milliardlab dollarlik harbiy yordam uchun qonunchilarga minnatdorchilik bildirishi, shuningdek, Kiyevga ajratilayotgan moliyaviy resurslar miqdorini oshirishni so‘rashi kutilmoqda.

Bu Zelenskiyning Rossiya Federatsiyasining Ukrainada maxsus harbiy operatsiyasi boshlanganidan beri AQShga birinchi tashrifi bo‘ladi.