Jomboyda 26 ta yangi xonadon o‘z egalariga topshirildi
Kecha, 20 dekabr kuni Jomboy tumani Uzunovul massivida qurilgan ko‘p qavatli uylarning 26 ta zamonaviy xonadoni o‘z egalariga topshirildi.
O‘n yilki, mamlakatimizda namunaviy uy loyihasi asosida turar-joylar bunyod etilmoqda. Buning samarasida o‘tgan davr mobaynida minglab ehtiyojmand fuqarolar o‘z yashash joyiga ega bo‘ldi. Har tomonlama qulay, jahon standartlariga mos shunday uy-joylar tumanning Uzunovul massivida ham qisqa fursatda qurib bitkazildi.
Xonadonlarni foydalanishga topshirish marosimida mehnat faxriylari, jamoatchilik vakillari va mutasaddilar ishtirok etdi.
Ko‘p qavatli turar-joydan kenja o‘g‘liga uy olgan Fotima Dovurovaning ham quvonchi cheksiz.
– Uch farzandim bilan bir uyda yashardik, – deydi onaxon. – Hokimlik vakillariga qilgan murojaatimiz o‘rganildi, sharoitimiz hisobga olindi va imtiyozli shartlar asosida uy berishdi. Xalqparvar siyosat yuritayotgan barcha rahbarlarga o‘z minnatdorchiligimizni bildiramiz.
Tadbirda viloyat hokimi o‘rinbosari G.Alimova hamda tuman hokimi H.To‘ychiyev qatnashdi.
Jomboy tumani hokimligi axborot xizmati.
