Narpaydagi 6 ta maktab mukammal ta’mirlandi
Joriy yil Narpay tumanidagi 6 ta umumiy o‘rta ta’lim maktabida investitsiya hamda “Obod qishloq” davlat dasturi asosida mukammal ta’mirlash ishlari amalga oshirildi.
Olib borilgan bunday bunyodkorlik ishlari maktablarda ta’lim-tarbiya sifati va samaradorligini oshirishga, pedagoglar faoliyati uchun keng imkoniyatlar yaratilishiga hamda o‘quvchi-yoshlarning puxta bilim olib, jismonan sog‘lom voyaga yetishiga xizmat qilmoqda.
- Bugun 1050 o‘rinli maktabimizda 1117 nafar o‘quvchi ta’lim-tarbiya olmoqda, - deydi Narpay tumanidagi 17-umumiy o‘rta ta’lim maktabi o‘qituvchisi Marhabo Jabborova. - Avval sinfxonalar yetishmas, fizika, kimyo va biologiya fanlari dars mashg‘ulotlarini moslashtirilmagan sinfxonalarda o‘tkazishga majbur bo‘lardik. Mukammal ta’mirlash ishlaridan so‘ng o‘quvchilarni kichik guruhlarga bo‘lib o‘qitish uchun 5 ta ingliz tili, 3 ta rus tili sinfxonalari, shuningdek, fizika, kimyo va biologiya fanlarini o‘qitishga mo‘ljallangan, barcha zarur asbob-uskunalari bilan jihozlangan o‘quv laboratoriyalari foydalanishga topshirildi. Bu o‘z navbatida, maktabimizda ta’lim mazmun-mohiyatini yanada oshirish, o‘quvchilarimizning mukammal bilim olishiga imkoniyat yaratdi.
- Har yili yog‘ingarchilik mavsumi yaqinlashaversa jamoamiz bilan tashvishga tusha boshlardik, - deydi 27-umumiy o‘rta ta’lim maktabi direktori Malohat Suyarqulova. - Negaki, ta’lim muassasamizning deraza va eshiklari ancha eskirgan, sport zalimizning ustki qoplamasi ko‘chib tushgandi. Amalga oshirilgan mukammal ta’mirlash ishlari natijasida 9x18 maydonga ega sport zalimizning tom qismi to‘liq ta’mirlandi, poli yangilandi. Eski eshik-romlari zamonaviylariga almashtirildi. Avval pol qismining qoplamalari ko‘chib, chang ko‘tariladigan 14 ta sinfxonalarning poli yangilandi.
Ana shunday bunyodkorlik ishlari 61-umumiy o‘rta ta’lim maktabida ham amalga oshirildi. Maktabning issiqlik tizimi tubdan yangilandi, hovlisi temir panjaralar bilan o‘raldi, eshik-derazalar almashtirildi. Bundan tashqari, o‘quv binolarining fasadi to‘liq ta’mirlanib, zamonaviy yoritish moslamalari o‘rnatildi.
Samarqand viloyati xalq ta’limi boshqarmasi axborot xizmati.
