O‘zbek filmlari Osiyo kinofestivalida g‘olib bo‘ldi
Yosh o‘zbek kinoijodkorlari taqdim etgan filmlar Gongkongda o‘tkazilgan “DigiCon6 Asia Awards 2019” xalqaro qisqa metrajli filmlar festivalida mutaxassislar tomonidan e’tirof etildi.
Mahliyo Asqaraliyevaning “Sovg‘a” filmi ushbu nufuzli xalqaro festivalning “Next Generation” nominatsiyasida g‘olib deb topildi.
Shokir Xoliqovning “Choy” filmi festivalning “Mintaqa g‘olibi” nominatsiyasi sovrindori bo‘ldi.
Mazkur xalqaro qisqa metrajli filmlar festivali Yaponiyaning TBS media markazi tomonidan tashkil etildi. Festivalda Yaponiya, Xitoy, Hindiston, Indoneziya, Koreya, Malayziya, Singapur, Tayvan orollari, Tailand yosh kinoijodkorlarining qisqa metrajli filmlari namoyish qilindi.
Eslatib o‘tamiz, yaqinda Shokir Xoliqovning “Choy” filmi Kann kinofestivalida Gran-priga loyiq ko‘rilgandi. Endi ushbu film Yaponiyaning markaziy telekanallarida namoyish etiladi.
“O‘zbekkino” milliy agentligi axborot xizmati.
