Samarqand tumanida sodir bo‘lgan sel bo‘yicha rasmiy ma’lumot berildi
Kecha, 9 may kuni yoqqan kuchli yomg‘irdan so‘ng bir qator hududlarda sel kelgani haqida ijtimoiy tarmoqlarda xabarlar tarqaldi.
Xususan, Samarqand tumanida sel avtomashinani ham oqizib ketgani aytilgandi.
Favqulodda vaziyatlar vazirligi xabariga ko‘ra, 9 may kunidan 10 may kuniga o‘tar kechasi Samarqand tumani “Yuqori Ohalik” MFYda qisqa muddatli ko‘p miqdorda yomg‘ir yog‘ishi natijasida ushbu hududdan oqib o‘tuvchi soyga yomg‘ir suvlari sig‘may, toshib chiqqan.
Hodisa oqibatida taxminan soat 23:30 larda ushbu mahallada yashovchi fuqaro M.A.ga tegishli bo‘lgan Jiguli - “VAZ-21011” rusumli avtomobilni uyi yaqinida yomg‘ir suvlari taxminan 40-50 metr masofaga surib borgan, natijada avtomobilga qisman zarar yetgan.
Hodisa oqibatida tan jarohati olgan va halok bo‘lganlar yo‘q. Holat yuzasidan tuman favqulodda vaziyatlar bo‘limiga fuqarolar tomonidan murojaatlar kelib tushmagan, deyiladi xabarda.
