“Human”дан жабрланганларнинг 872 нафари ўз пулларини олди

“Human” хусусий бандлик агентлиги томонидан амалга оширилган жиноий ҳаракатлар оқибатида жабр кўрган фуқароларга етказилган моддий зарарларни қоплаш мақсадида мамлакатимиз ҳудудларида МИБ, “Ипотекабанк” ҳамда Ташқи меҳнат миграцияси агентлиги ходимларидан иборат ишчи гуруҳлар ташкил этилиб, уларга маблағларини қайтариб бериш бошлангани ҳақида хабар берган эдик.

Кеча, 20 февраль соат 18:00 ҳолатига кўра, жабрланувчи, деб топилган ва моддий зарар ундирилиши белгиланган фуқароларнинг 872 нафарига 16,5 миллиард сўмдан ортиқ пул маблағлари тўлаб берилди. Улардан 845 нафари пластик карта кўринишида, 27 нафари эса нақд пул шаклида олган.

Хусусий бандлик агентлигидан жабрланганларга пул маблағларини тўлаб бериш жараёни давом этмоқда, дея маълум қилди Ташқи меҳнат миграцияси агентлиги матбуот хизмати.