Сайёҳ Соҳиб Ражабов: Хонободдан Мўйноққача 2200 километр

Аслида самарқандлик спортчи йигит, турон миллий якка кураши бўйича халқаро спорт устаси, икки карра Осиё чемпиони бўлган Соҳиб Ражабов Республикамизнинг шарқий қисмидан ғарбий қисмигача бўлган 2200 километрлик масофани пиёда босиб ўтишга аҳд қилди. У Андижон вилоятининг Хонобод туманидан Қорақолпоғистон республикаси Мўйноқ туманига қараб йўл олганига бугун 49 кун бўлибди. У шу вақт давомида 1000 километр йўл босиб, айни пайтда у ўзи туғилиб ўсган Самарқанд шаҳрига етиб келди.

- Бир суткада 82 километргача масофани босиб ўтдим, - дейди С.Ражабов. – Йўлимда учраган ҳар бир ҳудуднинг ўзига хос масканларида бўлдим, тўй-томошаларида иштирок этдим. Бу саёҳатимни юртимизнинг тонги эрта отадиган туманидан, қуёши кеч ботадиган туманигача давом эттиришни олдимга мақсад қилганман. Асосийси, таассуротларим ҳақида телеграмм мессенжерим, ижтимоий тармоқлар ва оммавий ахборот воситалари орқали аҳолимиз, ёшларимиз, ҳатто ҳорижликлар хабардор бўлиб бормоқда. Бу ҳаракатларим, аввало, юртимизнинг диққатга сазовор жойларини, халқимизнинг меҳмондўстлигини кўрсатиб, ички туризмни ривожлантиришга, хорижлик сайёҳларни мамлакатимизга жалб қилишга, қолаверса, аҳоли ўртасида меҳр-оқибат туйғуларини, соғлом турмуш тарзини тарғиб қилишга озгина бўлса ҳам ҳисса қўшса ўзимни бахтиёр ҳис қиламан.

Бугун куннинг иккинчи ярмида вилоят туризмни ривожлантириш департаменти вакиллари сайёҳ Соҳиб Ражабов билан Самарқанд шаҳридаги Хотира майдонини зиёрат қилаётган пайтда учрашди. Унга Ўзбекистон Республикаси туризмни ривожлантириш давлат қўмитасининг эсдалик совғалари топширилди.

Тўлқин Сиддиқов.