13 км. йўл, 60 та симёғоч, 600 та газбаллон ва 213 кишига даволаниш учун йўлланма: Республика ишчи гуруҳининг оғир ҳудудлардаги фаолияти давом этмоқда
Республика Президенти топшириғига асосан жойларда оғир ҳудуд деб белгиланган аҳоли манзилларида ҳудудлар инфратузилмасини яхшилаш ишлари давом этмоқда.
Тегишли дастурга вилоятнинг оғир ҳудудларидан ҳисобланган Каттақўрғон туманидаги “Чуянчи”, Иштихон туманидаги “Чағатой”, Паст Дарғом туманидаги “Олтиқаҳрамон” ҳамда Оқдарё туманидаги “Янгиқўрғон” маҳаллалари киритилган.
Ушбу ҳудудлар аҳолисини ўйлантириб келаётган муаммоларга ўз вақтида ва сифатли ечим топиш мақсадида Президент маслаҳатчисининг биринчи ўрибосари Қаҳрамон Сариев бошчилигидаги Республика ишчи гуруҳи вакиллари бевосита жойларга чиққан холда уйма-уй юриб ўрганишлар олиб бормоқда. Аниқланган муаммоларни бартараф этиш борасидаги ишлар давом этмоқда.
Жумладан, маҳаллалардаги ижтимоий инфратузилмани яхшилаш борасида 13 километрдан зиёд ички йўллар асфальтланган, эски ёғоч электр устунлар 60 та янги темир - бетон устунларга алмаштирилган, икки километрга яқин янги электр сим тармоқлари тортилган, икки дона янги трансформатор пункти ўрнатилган, икки километрга яқин газ қувурлари жорий ва капитал таъмирланган. Фуқаролар мурожаати асосида ҳудудларга 600 дан зиёд қўшимча суюлтирилган газ балонлари алмаштириб берилган. Ҳудудлардаги барча қабристонларда ободонлаштириш ишлари, мавжуд дарахтларга шакл берилиб, деворлари оқлаш ва қабрлар атрофини тозаш ишлари олиб борилмоқда.
Бундан ташқари қиш мавсуми олдидан икки мингдан зиёд хонадонда техника хавфсизлиги қоидаларига амал қилиниши, иситиш печкалари (кўмир, ўтин ва суюлтирилган газга мослаштирилган печ ва плиталар)ни мавсумга тайёргарлик ҳолати тўлиқ ўрганилиб, мўрилари тозаланган, аниқланган камчиликлар бартараф этилган.
Аҳоли саломатлигини ҳимоя қилиш мақсадида уч минг нафарга яқин фуқаро чуқурлаштирилган тиббий кўрикдан ўтказилди ва унинг натижасида вилоят ва туман соғлиқни сақлаш муассасаларида даволанишга эҳтиёжи бор 213 нафар фуқаро даволаниш учун бепул йўлланма билан таъминланди. Шу билан бирга 30 дан зиёд эҳтиёжманд оилаларга ногиронлик аравачалари топширилди.
Ўрганишлар давомида аниқланган 100 га яқин ишсиз фуқаро ҳақ тўланадиган жамоат ишларига жалб этилди, кам таъминланган фуқароларга хонадон таъмири учун қурилиш материаллари бепул етказиб берилди ҳамда боқувчисини йўқотган фуқароларнинг хонадонларини таъмирлаш ишлари бошланди.
Республика ишчи гуруҳи фаолияти давом этмоқда.
