20-22 декабрь кунлари  яна совуқ ҳаво ва қор ёғиши кутилмоқда

Республика Гидрометеорология хизмати агентлиги тақдим этган тезкор маълумотга кўра, 20-22 декабрь кунлари Ўзбекистон ҳудудига нам ва совуқ ҳаво массалари кириб келади.

20-21 декабрь кунлари республика бўйича баъзи жойларда ёғингарчилик (ёмғир, қор) кузатилади, тоғ олди ва тоғли ҳудудларда кучли бўлиши мумкин.

Шамол тезлиги баъзи жойларда 13-18 м/с гача кучаяди. 21-22 декабрь кунлари ҳаво ҳарорати кечалари 7-10 даража совуққача, кундуз кунлари 0-3 даража совуққача пасаяди. Йўлларда яхмалак кузатилади.

Шундан келиб чиқиб, содир бўлиши мумкин бўлган фавқулодда вазиятларнинг олдини олиш, юзага келганда уларнинг оқибатларини бартараф этиш ҳамда хавфсизликни таъминлаш мақсадида барчадан ҳушёрлик талаб этилади.

20-22 декабрь кунлари вилоят, шаҳар ва туманлар фавқулодда вазиятлар бошқарма ва бўлимлари ҳамда унинг ҳудудий қуйи тизимига кирувчи куч ва воситаларининг 24 соатлик навбатчилиги ташкил этилади.

Агарда жойларда об-ҳавонинг кескин ўзгариши билан боғлиқ юзага келиши мумкин бўлган фавқулодда вазиятлар билан боғлиқ ҳолатлар кузатилса, вилоят фавқулодда вазиятлар бошқармасининг (66)240-06-01, (66)240-06-02 ёки 1050, 101 телефон рақамлари орқали тезкор бошқарув марказининг навбатчи-диспетчерлик хизматига қўнғироқ қилишингиз мумкин.