79 ёшли аёл ва унинг набирасини ўлдирганликда гумонланувчи шахс қўлга олинди
Қорақалпоғистоннинг Тўрткўл туманида аёл киши ва унинг ёш набираси ўлдириб кетилгани ҳақидаги хабарга Бош прокуратура матбуот хизмати муносабат билдирди.
Унга кўра, мазкур ҳолат юзасидан Тўрткўл тумани прокуратураси томонидан Жиноят кодексининг 97-моддаси (қасддан одам ўлдириш) билан жиноят иши қўзғатилиб, тергов ҳаракатлари олиб борилган.
Хабарда айтилишича, ўтказилган тергов ҳаракатлари давомида фуқаро Ж.С. (1991 йилда туғилган, ишсиз) 29 ноябрь куни ўғирлик қилиш мақсадида кирган хонадонда яшаётган 79 ёшли аёл ва унинг набирасини ошхона пичоғи билан қасддан ўлдириб, пул ва 2 дона уяли телефон аппаратини олиб кетгани аниқланган.
Маълумотларга кўра, терговда фуқаро Ж.С. гумон қилинувчи тариқасида ишда иштирок этишга жалб қилиниб, суднинг ажрими билан унга “қамоқ” эҳтиёт чораси қўлланилган ва тергов ҳаракатлари давом этмоқда.
