Франк-Вальтер Штайнмайернинг Украинага ташрифи осон кечмади
Германия президенти Франк-Вальтер Штайнмайер уруш бошланганидан бери Украинага илк бор ташриф буюрди.
Киевда кўпчилик уни россияпараст сиёсатчи деб билади ва бир неча ой олдин уни бу ерда кўришни истамасликларини ҳам очиқ айтишган. Штайнмайер можарони аниқ бир хабар билан тугатишга умид қилмоқда:
“Менинг украиналикларга мурожаатим шуки, биз нафақат сиз томонни қўллаб-қувватлаймиз, балки Украинани иқтисодий, сиёсий ва ҳарбий жиҳатдан қўллаб-қувватлашда давом этамиз”.
Киевга етиб келишидан олдин у Чернигов вилоятидаги бомба бошпанасида бир ярим соат вақт ўтказди: унинг ташрифи чоғида ҳаво ҳужуми огоҳлантириши эълон қилинди.
Украинанинг ноқонуний аннексия қилинган ҳудудларида Россия томонидан жорий этилган ҳарбий ҳолат бу ҳудудларга тинчлик келтирмади. Кеча Запорожье вилоятининг Мелитополь шаҳрида бомба ўрнатилган автомобиль ФСБ ва телеканал биносини вайрон қилди. Беш киши жароҳатланган. Зудлик билан тергов қўмитаси ташкил этилишини эълон қилган вилоят раҳбарининг сўзларига кўра, телекомпания ўз фаолиятини давом эттирмоқда.
Москва Украинанинг жанубий жабҳада Куземовка яқинидаги йирик ҳужумини қайтарганини даъво қилмоқда. Киевнинг билдиришича, душанба куни Россиянинг ўққа тутилиши оқибатида камида 7 нафар тинч аҳоли ҳалок бўлган, қўшни Донецк вилоятида ҳам 19 турар-жой биноси ва электр узатиш линияси вайрон қилинган.
Украинанинг катта қисмида ҳаёт янада хавфли ва қийинлашиб бормоқда. Фронт чизиғидан унча узоқ бўлмаган Николаевда фуқаролар озиқ-овқат ва ичимлик суви учун ҳар куни навбатда туришади. Кўп уйларда электр, сув, иситиш тизими йўқ. Қиш ундан ҳам аянчли кунларни "ваъда бермоқда".
