Гулбека Қўчқорова: “Тадбиркорликни иккита тикув машинасида бошлаганман”
Халқ депутатлари Самарқанд вилоят Кенгаши депутати, “Бека-Чарос ” хусусий корхонаси раҳбари Гулбека Қўчқорова мамлакатимизда тадбиркорлар учун яратилган шарт-шароитлардан фойдаланиб, 2008 йилда давлатдан олган 2 миллион кредит маблағи эвазига 2 та тикув машинасини сотиб олади ва “Бека -Чарос” хусусий корхонасини ташкил этади. Бугунги кунда тадбиркор 40 дан ортиқ ишчи ўринларини яратган.
- Мен эришган барча ютуқларимни Тадбиркорлар ва Ишбилармонлар ҳаракати - Ўзбекистон либерал демократик партияси билан боғлайман. Сабаби, илгарилари тадбиркор бўлиш фикри хаёлимда ҳам бўлмаган. 2003 йил O’zLiDeP сиёсий саҳнага кириб келгач, юртимизда кичик бизнес ва хусусий тадбиркорликни ривожлантириш борасида қатор қарор ва фармонлар, қонун ҳужжатлари қабул қилиниб, ҳаётга татбиқ этилиши мендек оддий ҳисобчининг соҳада ўзимни синаб кўришимга туртки бўлган. Бугун 40 нафардан ортиқ ишчи ходимлар меҳнат қилаётган корхонамда 90 турдан ортиқ иш кийимлари тайёрланмоқда. Тадбиркор сифатида элга танилгач, мени 2014 йилда халқ депутатлари Самарқанд вилоят Кенгашига депутат сифатида сайлашди. Билдирилган ишонч менда масъулиятни икки карра оширди. Бугунги кунда нафақат ишлаб чиқарган маҳсулотларим билан балки, депутат сифатида халқимизнинг муаммоларини ечишда иштирок этаётганлигимдан фахрланаман, - дейди Гулбека Қўчқорова. - Кейинги йилларда муҳтарам юртбошимиз томонидан соҳани ривожлантиришга катта эътибор қаратилиб, турли имтиёзлар яратиляпти. Бу бизга қанот бағишлаш билан бир қаторда, турли янги лойиҳалар устида ишлашга ундайди. Шу боис корхонамизни кенгайтириш мақсадида 100 ўринга мўлжалланган янги замонавий тикув цехи қуряпмиз. Бундан ташқари, жорий йил Паст Дарғом туманидаги 30 000 нафар ўқувчиларни мактаб формалари билан таъминлаш мақсадида давлатдан 250 миллион кредит олдик.
Гулбека Қўчқорова депутат сифатида халқ билан мулоқот қилиш, уларнинг дардини эшитишга ҳам алоҳида вақт ажратади. Жорий йилнинг ўтган даври мобайнида сайловчилар билан 10 га яқин учрашувлар ташкил қилиб, келиб тушган мурожаатлар юзасидан 10 га яқин ташкилотларга депутатлик сўровлари йўллаган.
Бахтигул Қаршиева,
O’zLiDeP Самарқанд вилоят Кенгаши матбуот котиби.
