ҲАМАС урушни тугатиш учун барча гаровга олинганларни озод қилишга тайёр. АҚШ Хитой божларини пасайтириши мумкин. Чеченистон раҳбарининг саломатлиги ёмонлашмоқда, у ҳукуматни ўғлига ўтказмоқчи
🔹 ҲАМАС Ғазодаги урушни тугатиш ва исроиллик гаровга олинганларни Исроил қамоқхоналарида сақланаётган фаластинликлар билан алмашиш бўйича кенг қамровли келишувга эришмоқчи, деди гуруҳнинг юқори мартабали расмийси Исроилнинг вақтинчалик сулҳ таклифини рад этиб. Миср воситачилари январь ойидаги ўт очишни тўхтатиш бўйича келишувни қайта жонлантириш устида ишламоқда, бироқ тараққиёт деярли йўқ, Исроил ва ҲАМАС бир-бирини айбламоқда.
🔹 Хитой маҳсулотларига қўйилган 145 фоиз АҚШ божхона тўловлари камайтирилиши мумкин. Бу ҳақда АҚШ президенти Доналд Трамп пайшанба куни Оқ уйда журналистлар билан бўган қисқа суҳбатда айтган. Унинг айтишича, Вашингтон ва Пекин яқин уч-тўрт ҳафта ичида савдо келишувларига эришиши мумкин. Аммо бугун Хитой авж олган савдо уруши фонида Америкадан суюлтирилган газ сотиб олишни вақтинча тўхтатди. Суюлтирилган газ Хитойга энди асосан Россиядан келади.
🔹 АҚШ Давлат котиби Марко Рубио айтишича, агар Украинадаги можарога барҳам берилмаса, АҚШ ўз саъй-ҳаракатларида “давом этиши” керак. "Трамп 87 кун давомида ушбу урушни тугатиш учун саъй-ҳаракатлар қилди. Энди бу мумкин ёки йўқлигини ҳал қилишимиз керак бўлган нуқтага келдик. Шунинг учун биз иккала томонни ҳам жалб қиламиз", деди М.Рубио.
🔹 Сўнгги пайтларда соғлиғи ёмонлашгани сабабли омма олдига камдан-кам чиқаётган Рамзан Қодиров кутилмаганда Кремлда Россия президенти Владимир Путин ва Қатар амири Тамим бин Ҳамад Ол Соний ўртасидаги учрашувда пайдо бўлди. 2024 йил августида Путин билан норасмий учрашувда Қодиров ўғли Адамни ўзининг вориси сифатида кўриш ниятини билдирган ва бу қонунни бузмаслиги учун “схема танлаш”ни таклиф қилган. Бироқ у рад этилди. Шундан сўнг, манбаларга кўра, Қодиров Қатар раҳбарияти билан яширин музокараларни бошлаган. Чеченистон раҳбарининг саломатлиги ёмонлашишда давом этмоқда ва яқин келажакда у ўз вазифаларини бажариш қобилиятини бутунлай йўқотиши мумкин.
🔹 Бир кечада 56 та Украина учувчисиз учоқлари Россия ҳудудларида уриб туширилди.
🔹 АҚШнинг Ямандаги зарбалари оқибатида камида 40 киши ҳалок бўлди.
🔹 Россиянинг Анапа шаҳрида мазут оқиши сабабли курорт мавсумининг очилиши тақиқланди.
🔹 АҚШнинг собиқ президенти Жо Байден давлат раҳбари лавозимини тарк этгач, тадбирларда маърузачи сифатида ўз хизматларини таклиф қила бошлади, у бир нутқ учун "атиги" 300 минг доллар сўрайди. New York Post айтишича, агар Байден бошқа шаҳарда гапирса, унга шахсий самолёт ва беш нафар ходим учун харажатлар ҳам керак бўлади. Бироқ, сиёсатчини тинглайдиган одам кам.
Гулнора Холдорова тайёрлади.
