Ижод – кўнгил иши
Масалан, яқинда бир фермер йигит таҳририятга келди. Икки-учта дафтарни шеърлар билан тўлдирибди. Айтишича, беш-олти йилдан буён қалам тебратиб тураркан. Уйида кичикроқ кутубхонаси бўлиб, мунтазам китоб, газета-журнал ўқиб бораркан. Фермер билан ўтган йигирма дақиқалик суҳбат асносида шу нарса ойдинлашдики, унинг билими нафақат ўзига етарли, балки бинойидек адабиёт, ижод ҳақида ҳам тушунчага эга. Қолаверса, замон талаби ҳам шу.
Юмор, сатира доим кишиларни ҳушёр торттирган. Бадиий ижоднинг бу тури бизда қадимдан мавжуд бўлса-да, сўнгги йилларда нашрларимизда анча камайиб кетди. Хусусан, нурободлик фахрий ўқитувчи Қаюм Турғон жўнатган туркум шеърларда жамиятимиздаги айрим иллатлар тилга олинган. Айниқса, "Бир бозор нақли" шеърий фельетони кишини жиддий мушоҳадага ундайди:
Номим улуғ: Отанг – бозор,
онанг – бозорман,
Олгич, сотгич, даллол кўнглин ёзарман.
Ҳалол, фақир, соф одамлар фуқаром,
Товламачи, юлғичлардан безорман.
Ёки
Ўзим гавжум, катта йўл устидаман,
Мудом қору, ёмғир, дўл остидаман.
Расталарим ёзда чангу, қишда лой,
Чанг-ғубордан озурдадир нон ширмой...
Ургут туманидан А.Самадовнинг туркум шеърларида одамийлик, меҳр-муҳаббат ва аёл улуғланади. Айниқса, она ва аёл тимсолига шеъриятда кўплаб мурожаат бўлгани, аммо уларнинг таъриф қилиб бўлмас сифатлари эътироф этилган.
Қўшработ иқтисодиёт ва сервис касб-ҳунар коллежи ўқувчиси Ботирбек Омонов ҳам бир қатор машқларини жўнатган. Қаламкашнинг ёзганларида ёшликка хос туйғулар, ҳолатлар кўпроқ тилга олинган. Шунингдек, иштихонлик Нодира Тоштемирова машҳур ёзувчимиз Абдулла Қаҳҳорнинг асарлари номини бирма-бир келтириб, шеър битган.
Фаол жамоатчиларимиздан бири – Ургут тумани Камангарон маҳалласидан Мурод Қурбонзода ҳам туркум шеърларини жўнатган. У кишининг битикларида Ватан тараққиёти, мамлакатимизда амалга оширилаётган эзгу саъй-ҳаракатлар эътироф этилган.
Жомбой тумани Гулистон маҳалласидан мактуб йўллаган Ўлмас Очиловнинг машқларида одамларнинг бирдамлиги, жамиятда устоз-мураббийларнинг ўрни ҳақида сўз боради.
Бундан ташқари, Каттақўрғон туманидан Фурқат Норқулов "Менинг Ватаним", "Ота-она учун не қилдик?", Оқдарё туманидан Ҳикмат Элмуродов "Даҳбедим", Худойназар Абдураҳмонов "Гўзаллик", Нуробод туманидан Машраб Кулгачов "Исмингни айт", Ургут туманидан Акбар Усмонов "Ифтихор", Хуррам бахши Эшмуродов эса "Ўзбекистоним" шеърларини таҳририятга жўнатишган.
Ургутлик муаллим, халқ таълими аълочиси Мавлон Мамадаминов ҳам туркум шеърларини жўнатган. Масалан, "Балхи тут" шеърида у шундай ёзади:
Бобомнинг отаси эккан балхи тут,
Кўчамиз бошида қартайиб турар.
Ўтган-кетганларга соябон бўлиб,
Иссиқ кунларда ҳам чайқалиб турар.
Мазкур мисралардан англашиладики, ҳаётда қилинган ҳеч бир яхши иш изсиз кетмайди. Айниқса, бугун экилган ниҳолдан фурсат келиб, набираларингиз, қолаверса, халқ наф кўради. Ижодкор бу ўринда табиатнинг ҳассослигига ҳам ишора қилмоқда.
Иштихонлик ижодкор Отабек Ўроқов эса тилимиз имкониятларидан моҳирона фойдаланиб, китоб ҳақидаги шеърини йўллаган:
Компьютерлар керакдир,
куйганида – кераксиз,
Кеча-кундуз кулбамда
куймагайдирсан, китоб.
Камтарликдан кўринишинг
кераксиздек кўринар,
Касбларнинг калитисан,
кўпга кераксан, китоб.
Ижод – кўнгил иши, дедик. Муҳими шундаки, инсон бу орқали қалбидагини юзага чиқаради ва руҳан енгилликка эришади. Ўз навбатида ўқувчига ҳам эстетик завқ беради. Адабиётнинг, ижоднинг кучи ҳам, инсон учун хизмати ҳам шунда.
.
