Жо Байден - АҚШнинг 46-Президенти

Америка оммавий ахборот воситалари Президент сайловида демократ Жо Байден ғалаба қозонгани ҳақида хабар бермоқда.

Сўнгги маълумотларга қараганда, у 273 та овоз олган. Бу эса ҳали сайлов натижалари батамом ҳисоблаб чиқилмасдан аввал Байден ғалаба қозонганидан далолат беради.

CNN, The New York Times ва АBC News унинг ғалабаси ҳақида эълон қилган.

Жумладан, CNNнинг ёзишича, Байден Пенсильвания штатида ҳам ғолиб чиққан ва унга овоз берган сайловчилар сони 273 нафарга етган. АBC News манбалари ҳам буни тасдиқлаган. Хабарда Пенсильванияда сайловчиларнинг аксарияти Байденга овоз бергани айтилади.

Пенсильвания штатидаги ғалаба Байденга 20 та сайловчи овозини берди. Бунгача Байден 253 овозга эга эди.

Эслатиб ўтамиз, АҚШда президент сайлови 3 ноябрь куни бўлиб ўтди. Асосий курашлар мамлакатнинг амалдаги президенти Дональд Трамп ва собиқ вице-президент Жо Байден ўртасида бўлди.