Jo Bayden - AQShning 46-Prezidenti

Amerika ommaviy axborot vositalari Prezident saylovida demokrat Jo Bayden g‘alaba qozongani haqida xabar bermoqda.

So‘nggi ma’lumotlarga qaraganda, u 273 ta ovoz olgan. Bu esa hali saylov natijalari batamom hisoblab chiqilmasdan avval Bayden g‘alaba qozonganidan dalolat beradi.

CNN, The New York Times va ABC News uning g‘alabasi haqida e’lon qilgan.

Jumladan, CNNning yozishicha, Bayden Pensilvaniya shtatida ham g‘olib chiqqan va unga ovoz bergan saylovchilar soni 273 nafarga yetgan. ABC News manbalari ham buni tasdiqlagan. Xabarda Pensilvaniyada saylovchilarning aksariyati Baydenga ovoz bergani aytiladi.

Pensilvaniya shtatidagi g‘alaba Baydenga 20 ta saylovchi ovozini berdi. Bungacha Bayden 253 ovozga ega edi.

Eslatib o‘tamiz, AQShda prezident saylovi 3 noyabr kuni bo‘lib o‘tdi. Asosiy kurashlar mamlakatning amaldagi prezidenti Donald Tramp va sobiq vitse-prezident Jo Bayden o‘rtasida bo‘ldi.