Кимларга гаровсиз кредит берилади?
Янги турмуш қурган ёшлар якка тартибдаги хонадонда қўшимча уй-жой қуриши учун гаровсиз кредит берилишини биласизми?
“Темир дафтар” ва “Аёллар дафтари”га киритилган оилаларнинг фарзандлари ҳамда “Ёшлар дафтари”га киритилган янги турмуш қурган ёшларнинг якка тартибдаги хонадонида қўшимча уй-жой қуриш учун гаровсиз кредит ажратиш тартиби тўғрисидаги низомига асосан кредитлар ёшларнинг алоҳида тоифаларига гаровсиз асосда ажратилади.
Бунда тегишлича “Саховат ва кўмак”, “Аёллар дафтари”, “Ёшлар дафтари”, “Темир дафтар” жамғармалари кафиллиги тақдим этилади.
Кафиллик берилганлиги учун тўлов (мукофот пули) ундирилмайди.
Қарз олувчилар, жумладан, қуйидаги мувофиқлик мезонларига мос бўлиши лозим:
- 18 ёшга тўлган ва 30 ёшдан ошмаган;
- янги (иккала томон учун биринчи маротаба) турмуш қурган;
- илгари арзон уй-жой қуриш дастурлари доирасида имтиёзли ипотека кредити олмаган бўлиши керак.
Шунга кўра, ёшларнинг алоҳида тоифаларига кредитлар:
- бозор ставкасида мижоз хоҳишига кўра 6 ой имтиёзли давр билан 20 йилдан кўп бўлмаган муддатга;
- бошланғич бадали якка тартибдаги хонадонда қўшимча қурилаётган уй-жой қийматининг 15 фоизидан кам бўлмаган миқдорда;
- бир қарз олувчига 33 миллион сўмдан ошмайдиган миқдорда берилади.
Тегишли ҳужжатлар тўлиқ тақдим қилингандан сўнг банк 3 иш кунида ариза берувчига кредит бериш масаласини кўриб чиқади.
Ариза қаноатлантирилган тақдирда, кредит шартномаси имзоланади.
Марказий банк вилоят бош бошқармаси ахборот хизмати.
