Кўзларимга ёш келди
Бугун эрталаб турсам, тест синовларига кириш учун абитуриентларга “Абитуриент рухсатномаси”ни бериш бошланди, деган хабарларга кўзим тушди.
Ҳозирги абитуриентлар “Абитуриент рухсатномаси”ни my.uzbmb.uz сайтидаги шахсий кабинети орқали юклаб олишлари мумкин, шундоқ битта тугмачага босади бўлди.
Ёки шахсий кабинетга кирмасдан, шунчаки my.uzbmb.uz/allow/bachelor-allow саҳифаси орқали паспорт серияси ва рақами ҳамда ЖШШИР рақамини киритган ҳолда олишлари мумкин.
Бизнинг давримизда бунақа нарсалар йўқ эди, рухсатнома олиш учун, албатта, абутириентнинг ўзи олийгоҳга бориши шарт эди. Бизнинг давримизда деганда мен динозавр даврини айтмаяпман, яқин ўн йил олдинги воқеалар. Ўша пайтларда рухсатнома олишнинг ўзи катта бир калмар ўйини эди.
Иссиқда олдин сарғайиб университетга борасан, ана ундан кейин рухсатнома берилаётган жойни топасан, кейин турнақатор навбат, терлаб-пишиб ур-йиқитлар орасида бир амаллаб рухсатномани оласан.
Ана шу рухсатнома бутун тақдирингни ҳал қилади, мабодо йўқотиб қўйсанг, бўлди, пишдинг, уни нусхаси йўқ, бошқа чиқариб ҳам ололмайсан, усиз имтиҳонга ҳам киролмайсан, фақатгина шу рухсатномани йўқотиб қўйиб қанча абитуриент ўқишга киролмаганлигига ўзим гувоҳ бўлганман.
Ҳозир-чи, замоннинг ўзгарганига қаранг, ҳеч қаерга боришинг шарт эмас, уйингда ўтириб битта тугмачани босиб, истаганча чиқариб олавер.
Эҳ, шунақа даврларни ҳам бошдан ўтказган эканмиз. Эсласам, кўзларимга ёш келади-э...
Бектош Ҳотамов.
