Нима сабабдан Россияда чиққан коронавирусга қарши вакцина ва “Авифавир” препарати Ўзбекистонга олиб келиниб, аҳолига тарқатилмаяпти?

Бугун АОКАда Санитария-эпидемиология назорати Давлат инспекцияси раҳбари Нурмат Отабеков иштирокида брифинг ўтказилди.

Унда аҳолидан тушган саволларга жавоб қайтарилди.

❓ Ўзбекистонга Россияда ишлаб чиқарилган коронавирусга қарши «Авифавир» препарати етказиб берилгани хабар қилинмоқда. Ушбу препарат ҳақида маълумот берсангиз?  Қаердан ва неча сўмга олса бўлади?

➖ 2020 йил 30 майда Россия Федерацияси Соғлиқни сақлаш вазирлиги Россияда Covid-19ни даволаш учун биринчи дори воситасини рўйхатдан ўтказди. Препарат “Авифавир” деб номланган бўлиб, ушбу препарат Covid-19 вируси кўпайиш механизмини бузиши, тўғридан-тўғри вирусга таъсир қилиши билан ажралиб туриши клиник тадқиқотлар пайтида исботланган ва Covid-19га чалинган беморларни даволашда юқори самарадорликни кўрсатганлиги учун Россия Федерациясида рўйхатдан ўтказилган.

Ҳақиқатдан ҳам сотувда ушбу препарат йўқ. Бироқ, Ўзбекистон Республикаси Хитой ва Ҳиндистонда ишлаб чиқилган “Авифавир” препаратини “Меҳр-шафқат” жамғармаси ҳисобидан харид қилган ва беморларни даволаш учун ишлатилмоқда.

❓ Нима сабабдан Россияда чиққан коронавирусга қарши вакцина Ўзбекистонга олиб келиниб, аҳолига тарқатилмаяпти?

➖ Ҳозир Россия Федерациясида ишлаб чиқарилган Covid-19га қарши вакцинанинг учинчи фаза клиник синовлари ўтказилмоқда.

Вакцина клиник синовлардан тўлиқ ўтказилиб, расман рўйхатдан ўтказилгандан сўнг, албатта Ўзбекистонга ҳам етарли миқдорда олиб келинади.