Nima sababdan Rossiyada chiqqan koronavirusga qarshi vaksina va “Avifavir” preparati O‘zbekistonga olib kelinib, aholiga tarqatilmayapti?

Bugun AOKAda Sanitariya-epidemiologiya nazorati Davlat inspeksiyasi rahbari Nurmat Otabekov ishtirokida brifing o‘tkazildi.

Unda aholidan tushgan savollarga javob qaytarildi.

❓ O‘zbekistonga Rossiyada ishlab chiqarilgan koronavirusga qarshi «Avifavir» preparati yetkazib berilgani xabar qilinmoqda. Ushbu preparat haqida ma’lumot bersangiz?  Qayerdan va necha so‘mga olsa bo‘ladi?

➖ 2020 yil 30 mayda Rossiya Federatsiyasi Sog‘liqni saqlash vazirligi Rossiyada Covid-19ni davolash uchun birinchi dori vositasini ro‘yxatdan o‘tkazdi. Preparat “Avifavir” deb nomlangan bo‘lib, ushbu preparat Covid-19 virusi ko‘payish mexanizmini buzishi, to‘g‘ridan-to‘g‘ri virusga ta’sir qilishi bilan ajralib turishi klinik tadqiqotlar paytida isbotlangan va Covid-19ga chalingan bemorlarni davolashda yuqori samaradorlikni ko‘rsatganligi uchun Rossiya Federatsiyasida ro‘yxatdan o‘tkazilgan.

Haqiqatdan ham sotuvda ushbu preparat yo‘q. Biroq, O‘zbekiston Respublikasi Xitoy va Hindistonda ishlab chiqilgan “Avifavir” preparatini “Mehr-shafqat” jamg‘armasi hisobidan xarid qilgan va bemorlarni davolash uchun ishlatilmoqda.

❓ Nima sababdan Rossiyada chiqqan koronavirusga qarshi vaksina O‘zbekistonga olib kelinib, aholiga tarqatilmayapti?

➖ Hozir Rossiya Federatsiyasida ishlab chiqarilgan Covid-19ga qarshi vaksinaning uchinchi faza klinik sinovlari o‘tkazilmoqda.

Vaksina klinik sinovlardan to‘liq o‘tkazilib, rasman ro‘yxatdan o‘tkazilgandan so‘ng, albatta O‘zbekistonga ham yetarli miqdorda olib kelinadi.